Universiteti i Shkencave të Aplikuara në Ferizaj ka reaguar publikisht ndaj planifikimit buxhetor për vitet 2027–2029, duke paralajmëruar se, sipas dokumenteve të Ministrisë së Arsimit dhe Shkencës, institucionit i është planifikuar buxhet zero.

Në një adresim publik, rektori prof. dr. Agron Bajraktari e cilësoi situatën si sfidën më serioze që nga themelimi i universitetit, duke theksuar se një planifikim i tillë do të rrezikonte funksionimin e universitetit, vendet e punës të stafit akademik e administrativ, si dhe të drejtën e studimit për mbi 2 mijë studentë.

Ai vlerësoi se USHAF-ja është universiteti i vetëm publik i shkencave të aplikuara në Kosovë, duke përmendur si arritje akreditimin institucional pesëvjeçar, projektet ndërkombëtare, bashkëpunimin me industrinë dhe rritjen e vazhdueshme të interesimit të studentëve.

Bajraktari u bëri thirrje institucioneve shtetërore që ta rishqyrtojnë këtë çështje, ndërsa theksoi se universiteti do të përdorë të gjitha mjetet demokratike dhe ligjore për të mbrojtur funksionimin e tij.

“Universiteti i Shkencave të Aplikuara në Ferizaj nuk do të mbyllet”, thuhet në mesazhin përmbyllës të adresimit, duke ftuar studentët, profesorët, bizneset dhe qytetarët të qëndrojnë të bashkuar në mbrojtje të institucionit.

Komento:

	Komenti