Republika e Kosovës pritet që me 14 dhjetor tëbëhet me ushtri.
Është një nga aleatët më të mëdhenj që ka
Kosova për shumë vite. Por, megjithëse i qëndruan vendit afër në proceset më të
rëndësishme, në rastin e nismës për transformimin e FSK-së në Ushtri që pritet
të ndodhë për pak ditë, Qeveria e kancelares Merkel ka shprehur rezervat e
veta. Në një përgjigje për Express, Qeveria gjermane thotë se në asnjë moment
nuk e vënë në pikëpyetje të drejtën sovrane të shtetit të Kosovës për të pasur
forcat e saj të armatosura, por konsiderojnë se tash për tash kjo nismë paraqet
rrezik për ashpërsimin e tensioneve me Serbinë dhe rrezikon dialogun
Qeveria e kancelares Angela Merkel mbështet të
drejtën e Republikës së Kosovës për të pasur ushtri, megjithatë thonë që për
momentin, nisma për transformimin e Forcës së Sigurisë së Kosovës në Ushtri të
Kosovës paraqet rrezik për ashpërsimin e tensioneve me Serbinë dhe vë në
pikëpyetje të gjithë procesin për normalizimin e raporteve me Serbinë që po
ndërmjetësohet nga Bashkimi Evropian.
Sipas tyre Kosova në këtë kohë duhet të ketë
prioritete tjera, siç janë zhvillimi ekonomik dhe përmirësimi i sundimit të
rendit dhe ligjit.
“Gjermania e njeh Kosovën si shtet sovran.
Prandaj, ne nuk e vëmë në pikëpyetje të drejtën sovrane të Kosovës për të
themeluar forcat të armatosura të rregullta. Sidoqoftë, transformimi duhet të
bëhet përmes kritereve që i përmenda më parë. Gjëja më e rëndësishme është që
procesi të kryhet në kohën e duhur. Tash për tash, kjo nismë paraqet rrezik për
ashpërsimin e tensioneve me Serbinë dhe po e rrezikon dialogun për normalizim,
që po udhëhiqet nga BE-ja. Për më tepër, ne besojmë se Kosova ka tjera
prioritete në këtë fazë të zhvillimit. Autoritetet do të duhej që ta investojnë
tërë energjinë e tyre në promovimin e reformave socio-ekonomike dhe ta
fuqizojnë dukshëm sundimin e ligjit”, thuhet në përgjigjen e Qeverisë së
Gjermanisë dhënë për Gazetën Express.
Qeveria e kancelares Merkel ndan të njëjtat
qëndrime të shprehura nga Sekretari i Përgjithshëm i NATO-s, Jens Stoltenberg,
rreth procesit të krijimit të ushtrisë, dhe thonë se ushtria e Kosovës duhet të
krijohet në përputhje me Kushtetutën dhe në bashkëpunim të ngushtë me NATO-n
dhe aleatët e saj, pa u nxituar.
“Transformimi i FSK-së nuk duhet të bëhet duke
u ngutur. Ai duhet të bëhet përmes një procesi gjithëpërfshirës, veçanërisht
duke e përfshirë pakicën serbe, të jetë në pajtueshmëri me Kushtetutën dhe të
bëhet në bashkëpunim të ngushtë me partnerët, sidomos me NATO-n dhe aleatët e
NATO-s” është qëndrimi i Qeverisë Federale të Gjermanisë dhënë për Gazetën
Express.
Sipas tyre transformimi i FSK-së në Ushtri
mund të fuqizojë stabilitetin rajonal dhe të ofrojë siguri vetëm nëse bëhet në
përputhje me Kushtetutën dhe në koordinim të ngushtë me NATO-n
“Sipas qeverisë kosovare, transformimi i
FSK-së ka për qëllim që ta fuqizojë stabilitetin rajonal dhe që ta kthejë
Kosovën nga një konsumuese të sigurisë në ofruese të sigurisë. Nga
këndvështrimi ynë, kjo mund të arrihet vetëm duke u kryer në bazë të kritereve
të përmendura më herët”, thuhet në përgjigjen e Qeverisë së kancelares Merkel.
Sekretari i Përgjithshëm i NATO-s, Jens
Stoltenberg, pas mbledhjes së mbajtur me Ministrat e Jashtëm të NATO-së, me
datë 4 dhe 5 dhjetor, ka thënë se nisma për transformimin e Forcës së Sigurisë
së Kosovës në Ushtri po bëhet në një kohë jo të duhur, dhe sipas tij kjo nismë
mund të ketë pasoja të rënda për rrugën euro-atlantike të Republikës së
Kosovës.
Stoltenberg për këtë çështje dje ka telefonuar
edhe kryeministrin Ramush Haradinaj, të cilit ia ka përsëritur të njëjtin
qëndrim. Ai gjithashtu ka zhvilluar edhe një bisedë me presidentin serb,
Aleksander Vuçiq, të cilit i ka kërkuar që të zbuten tensionet.
Megjithatë edhe përkundër këtyre deklarimeve,
faktori politik në vend mbetet i vendosur për të proceduar përpara me Ushtrinë
në seancën e 14 dhjetorit, pasi mbështetës shumë i fuqishëm në këtë nismë janë
Shtetet e Bashkuara të Amerikës.
Kryeministri Haradinaj gjatë vizitës së tij në
SHBA, ishte takuar me Sekretarin e Mbrojtjes, James Mattis me të cilin kishte
diskutuar për Ushtrinë. Pas kthimit në Kosovë Haradinaj patë deklaruar se
Kosova ka marrë ‘aminin’ e SHBA-së për krijimin e Ushtrisë së Kosovës.
E këtë e ka konfirmuar edhe dje ambasadori i
ri i Shteteve të Bashkuar të Amerikës në Kosovës, Philip Kosnett, i cili nismën për krijimin e Ushtrisë së Kosovës e
ka quajtur si hap pozitiv.
-2 °C
