Vetëvendosje kërkon nga Thaçit ta shpjegojë se cili dokument ishte i vërtetë për Spitalin Amerikan! – Ora Info Ballina | ORAinfo.com - Nuk ndalet

Vetëvendosje kërkon nga Thaçit ta shpjegojë se cili dokument ishte i vërtetë për Spitalin Amerikan!

14:41 | 31 Maj 2019

Drejtuesi i Komitetit për Shëndetësi, Jusuf Ulaj, dhe anëtari i Komitetit e kryetari i Qendrës së Prishtinës, Arben Vitia nga radhët e Lëvizjes Vetëvendosje në një konferencë për media kanë folur për “Afera Spitali”, me ç’rast kanë mbajtur përgjegjës për këtë skandal ish-kryeministrin Hashim Thaçi, tani president.

Përmes një komunikate për media Vetëvendosje thotë se mediat po vijojnë përditë me publikimin e skandaleve nga “Afera Spitali” ku janë përfshirë zyrtarë të lartë të institucioneve të Kosovës. Derisa e cilëson këtë si një nga skandalet më të mëdhenj në sistemin e shëndetësisë dhe i përfshin zyrtarët më të lartë dhe klientët e tyre të afërt.

“Përfaqësues të Lëvizjes Vetëvendosje që nga viti 2014 e deri sot, në vijimësi, jemi angazhuar dhe kemi qenë kundër ndërtimit dhe funksionalizimit të spitalit privat brenda hapësirës së QKUK-së. Nga të dhënat mbi këtë rast ne patëm konkluduar se spitali privat i përgjithshëm ishte dhe ende është i kundërligjshëm, i panevojshëm me qenë aty, dhe si i tillë pengon punën në shërbimin publik, pra në Qendrën Klinike Universitare (QKUK). Ky rast prej fillimit dallohej qartë se përmbante elementë të korrupsionit. Ndaj për këtë ne e kemi denoncuar pa reshtur”, thuhet në komunikatë.

Vetëvendosje tutje thotë se në mesin e skandaleve lidhur me këtë rast ministri Uran Ismaili në konferencën e para dy ditëve, u mundua që ta shfajësojë PDK-në dhe ta zhvendosë fajin diku tjetër, duke fshehur vendimin kryesor të marrë nga ish-kryeministri Hashim Thaçi në mbledhjen e 70-të qeverisë, me numër 08/70, më 25 qershor 2009, vendim që i hapi rrugën ndërtimit, ndryshimeve ligjore dhe funksionalizmit të spitalit privat brenda hapësirës së QKUK-së.

“Pak kohë pas konferencës për media të Ministrit të Shëndetësisë, përmes një portali të afërm me pushtetin, krahas fjalës së ministrit u publikuan vendimet dhe mes tyre një vendim i falsifikuar që përmban numrin e njëjtë të protokollit, të njëjtën datë të lëshimit, që thirret në të njëjtën mbledhje të Qeverisë por që ka përmbajtje krejt të kundërt – pra jo të lejimit por të “respektimit të vendimeve të mëparshme të qeverisë” që ndalonin ndërtimin e spitalit privat brenda hapësirës së QKUK-së”, thotë VV.

Vetëvendosje kërkon që në këto kushte ish-kryeministri Hashim Thaçi duhet të dëshmojë se cili nga këto vendime për spitalin privat është i saktë dhe cili është i falsifikuar. Ndërsa kryeministri i Republikës së Kosovës, Ramush Haradinaj, meqenëse e ka edhe obligim ligjor, duhet të bëjë publik transkriptin dhe vendimin e mbledhjes së Qeverisë së Kosovës të mbajtur më datën 25.06.2009. Po ashtu, ta publikojë vendimin në fjalë meqë nga faqja zyrtare e kryeministrit është eliminuar ky dokument.
E Vetëvendosje ka kërkuar hetime urgjente rreth këtij vendimi të Thaçit.

“Prokuroria e shtetit duhet të hapë në mënyrë urgjente hetimet rreth këtyre vendimeve të ish-kryeministrit të Kosovës, Hashim Thaçi dhe të mos zmbrapset nga hetimet rreth skandalit të fajdeve dhe videoincizimeve ku përmenden disa zyrtarë të PDK-së duke përfshirë edhe kryetarin e Kuvendit të Republikës së Kosovës, Kadri Veseli”, thuhet në komunikatë.

Ndërkaq, sipas VV-së, ministri i Shëndetësisë, Uran Ismajli ka përgjegjësinë e plotë që spitalin privat, qartazi produkt të krimit të organizuar, ta largojë nga mjediset e QKUK-së.

“Kjo duhet pasuar edhe me ngritjen e kallëzimit penal për të gjithë që janë përfshirë, dhe thellimin e hetimit edhe për të gjithë ata që kanë marrë pjesë në këtë aferë, pavarësisht nëse kanë pasur poste zyrtare apo jo. Këtu duhet përfshirë edhe kryeministri i atëhershëm, Thaçi, si një nga protagonistët, të cilin çuditërisht ministri harroi ta përmend në arsyetimin e tij. Ministri i Shëndetësisë, por edhe kryetari i Komunës, kanë tani përgjegjësi ligjore të marrin vendime kundrejt kësaj padrejtësie që i është bërë publikut, QKUK-së dhe shëndetësisë në Kosovës. Çdo vazhdim më tej është në dëm të pronës publike të qytetarëve të komunës së Prishtinës, pa llogaritur këtu edhe të gjitha dëmet e tjera që janë të lidhura me këtë aferë. Mosveprimi edhe më tej i tyre në këtë rast është në fakt lëndë për prokurorinë”, thuhet në komunikatë.

Vetëvendosje thotë se ky problem synon që ta mbulojë afërn e fajdeve në të cilën përmendet edhe Kadri Veseli.

“Ne e dimë saktë se ky vullnet nuk ka ekzistuar, dhe arsyeja e vetme për të cilën është aktualizuar ky problem nga Ministri i Shëndetësisë, ka qëllimin për ta mbuluar disi aferën e fundit me videot e dala në publik për kryetarin e PDK-së, Kadri Veselin, ku një grup personash pretendojnë se i kanë dhënë atij dhe bashkëpartiakëve të tij ryshfet. Në ditën në vijim do të vazhdojmë me adresimin e kësaj çështje tepër të rëndësishme”, thotë VV.

Komento: