Raporti i analizave laboratorike të Agjencisë së Ushqimit dhe Veterinarisë (AUV) ka konstatuar praninë e yndyrës bimore me karakteristika të vajit të palmës në disa produkte të Qumështores VITA, të cilat janë tregtuar si qumësht.
Sipas njoftimit të Ministrisë së Bujqësisë, Pylltarisë dhe Zhvillimit Rural, në kundërshtim me deklaracionin janë gjetur mostrat My Cow – Qumësht 3.2%, My Cow – Qumësht UHT 3.2% dhe Land – Qumësht UHT 3.2%, ndërsa në produktin Garden Milk 1L është konstatuar prani e yndyrës bimore dhe vajit të palmës, si dhe qumësht pluhur i padeklaruar.
Në total, dokumentacioni i shqyrtuar evidenton 26 produkte të operatorit me përmbajtje të vajit të palmës/yndyrës bimore.
Sipas Ministrisë, këto produkte nuk kanë qenë të aprovuara apo të autorizuara nga AUV-ja për aktivitetin e prodhimit të qumështit dhe produkteve të qumështit, ndonëse janë prodhuar dhe plasuar në treg.
Raporti ngre gjithashtu shqetësime për proceset e prodhimit dhe lëndët e para të përdorura. Për periudhën 2019–2026, ABRAZEN/VITA rezulton me rreth 3.45 milionë kilogramë qumësht pluhur të koncentruar të importuar, ndërsa për vajin e palmës evidentohen importe të konsiderueshme, përfshirë 980,880 kilogramë gjatë vitit 2025, raporton ORAinfo.
Ministria vlerëson se konstatimet tregojnë për dështime serioze dhe sistemike në proceset e prodhimit dhe kërkon që objekti dhe aktivitetet përkatëse të jenë nën mbikëqyrje të shtuar të AUV-së, me kontrolle, gjurmueshmëri dhe testime të vazhdueshme.
Veçmas, kërkohet verifikimi i produkteve të eksportuara në Maqedoninë e Veriut dhe Malin e Zi, pasi dokumentacioni evidenton eksportimin e produkteve My Cow dhe Land drejt këtyre vendeve. AUV-ja duhet të verifikojë lotet, sasitë, certifikatat dhe destinacionet e produkteve të prekura.
Për shkak të natyrës dhe shtrirjes së konstatimeve, Ministria ka bërë të ditur se çështja do t’i referohet Prokurorisë së Shtetit, për vlerësim dhe trajtim në kuadër të kompetencave ligjore.
Ministria thekson se referimi nuk paragjykon përgjegjësinë penale, ndërsa kërkon që të identifikohen dhe gjurmohen produktet e prekura, të ndërmerren masat përkatëse dhe të rikthehen proceset e prodhimit në përputhje me kërkesat ligjore. /ORAinfo/
Njoftimi i plotë:
Raporti i analizave të AUV-së konstaton vaj palme në qumështin e prodhuar dhe tregtuar nga Qumështorja VITA – 26 produkte të operatorit përmbajnë vaj palme/yndyre bimore.
Prishtinë, 10 gusht 2026 – Ministria e Bujqësisë, Pylltarisë dhe Zhvillimit Rural njofton opinionin publik se Raporti i analizave të Agjencisë së Ushqimit dhe Veterinarisë (AUV) ka konstatuar praninë e yndyrës bimore me karakteristika të vajit të palmës në produkte të prodhuara dhe të tregtuara si qumësht nga ABRAZEN Sh.P.K. – Qumështorja VITA. Ky është konstatimi kryesor që del nga analizat laboratorike: në produkte të tregtuara si qumësht është konstatuar yndyrë bimore me karakteristika të vajit të palmës, e cila nuk ishte deklaruar për konsumatorin.
Konkretisht, Raporti evidenton si “në kundërshtim me deklaracionin” mostrat My Cow – Qumësht 3.2%, My Cow – Qumësht UHT 3.2% dhe Land – Qumësht UHT 3.2%, ku profili i acideve yndyrore ka treguar praninë e yndyrës bimore me karakteristika të vajit të palmës. Në produktin Garden Milk 1L është konstatuar prani e yndyrës bimore dhe vajit të palmës, si dhe qumësht pluhur i padeklaruar.
Këto rezultate nuk përbëjnë vetëm çështje të etiketimit. Ato prekin përbërjen dhe identitetin e produkteve të tregtuara si qumësht. Konsumatori që blen një produkt të deklaruar si qumësht duhet të marrë produktin që i është deklaruar. Yndyra bimore me karakteristika të vajit të palmës nuk mund të zëvendësojë yndyrën e qumështit pa u reflektuar në përbërjen, emërtimin dhe deklarimin real të produktit.
Në tërësi, dokumentacioni i shqyrtuar evidenton 26 produkte të operatorit me përmbajtje të vajit të palmës/yndyres bimore. Veçanërisht e rëndësishme është se Qumështorja VITA kishte aprovim të AUV-së për aktivitetin e qumështit dhe produkteve të qumështit, ndërsa, sipas dokumentacionit të shqyrtuar, këto 26 produkte nuk kanë qenë të aprovuara apo të autorizuara për këtë aktivitet, ndonëse janë prodhuar dhe plasuar në treg.
Të dhënat mbi lëndët e para e bëjnë të domosdoshëm shqyrtimin e plotë të proceseve të prodhimit. Për periudhën e paraqitur 2019–2026, ABRAZEN/VITA rezulton me rreth 3.45 milionë kg qumësht pluhur të koncentruar të importuar, ose rreth 45% të sasisë së evidentuar në këtë kategori. Për hirrën pluhur evidentohen rreth 1.25 milionë kg. Ndërsa të dhënat për vajin e palmës evidentojnë importe të konsiderueshme, përfshirë 980,880 kg gjatë vitit 2025.
Natyra, shtrirja dhe përsëritja e këtyre konstatimeve tregojnë për dështime serioze dhe sistemike në proceset e prodhimit, ku produkte të prodhuara me përmbajtje të vajit të palmës janë plasuar dhe tregtuar me emërtime të produkteve të qumështit, përfshirë qumësht, djathë dhe gjizë. Në këto rrethana, çështja nuk mund të trajtohet vetëm në nivel të mostrave apo produkteve individuale, por kërkon vlerësimin dhe korrigjimin e të gjithë procesit të prodhimit. Për këtë arsye, kërkohet që objekti dhe aktivitetet përkatëse të vendosen nën mbikëqyrje të vazhdueshme dhe të shtuar të AUV-së, me kontrolle, gjurmueshmëri dhe testime të vazhdueshme, si dhe të ndërmerren masat e nevojshme ligjore dhe korrigjuese deri në eliminimin e plotë të këtyre dështimeve serioze dhe rikthimin e dokumentuar të proceseve dhe produkteve në përputhshmëri me kërkesat ligjore.
AUV është i obliguar që për secilën mostër dhe produkt jokonform të sigurojë gjurmueshmëri të plotë sipas kodit të mostrës dhe kodit laboratorik, duke e lidhur rezultatin me markën tregtare, produktin, lotin, datën e prodhimit, sasinë dhe destinacionin. Për produktet dhe lotet e prekura duhet të ndërmerren masat përkatëse sipas legjislacionit në fuqi. Inspektorati i Tregut, në kuadër të kompetencave të veta, duhet të verifikojë markat tregtare, emërtimin, deklaracionet dhe mënyrën e prezantimit të produkteve para konsumatorit.
Verifikim i veçantë i produkteve të eksportuara
Dokumentacioni i paraqitur evidenton gjithashtu eksportimin e produkteve të tregtuara si qumësht lope My Cow drejt Maqedonisë së Veriut dhe Malit të Zi, si dhe të qumështit Land drejt Maqedonisë së Veriut. Kjo merr rëndësi të posaçme për shkak se analizat laboratorike të AUV-së kanë konstatuar në mostrat përkatëse të My Cow dhe Land yndyrë bimore me karakteristika të vajit të palmës, të padeklaruar në produkt.
Për këtë arsye, AUV duhet të verifikojë menjëherë certifikatat veterinare/shëndetësore të eksportit, lotet, sasitë dhe destinacionet e produkteve përkatëse dhe të përcaktojë nëse produkte që analizat zyrtare i kanë gjetur me yndyrë bimore me karakteristika të vajit të palmës janë certifikuar për eksport sipas kategorisë së produkteve me prejardhje shtazore. Nëse konstatohet mospërputhje ndërmjet përbërjes reale dhe kategorisë sipas së cilës produkti është certifikuar, kjo prek jo vetëm operatorin ekonomik, por edhe integritetin e sistemit shtetëror të certifikimit dhe besueshmërinë e produkteve të qumështit dhe bylmetit të Kosovës në tregjet e jashtme.
AUV është e obliguar të sigurojë që certifikimi për eksport të bëhet në përputhje me llojin, natyrën, përbërjen dhe kategorinë reale të produktit. Për çdo mospërputhje të verifikuar duhet të ndërmerren veprimet korrigjuese dhe, kur kërkohet sipas rregullave përkatëse, të njoftohen pa vonesë autoritetet kompetente të vendeve të destinacionit.
Duke marrë parasysh natyrën, shtrirjen dhe seriozitetin e konstatimeve, përfshirë indikacionet për dështime sistemike në proceset e prodhimit, prodhimin dhe plasimin në treg të produkteve me vaj palme me emërtime të qumështit, djathit apo gjizës, si dhe çështjet që lidhen me gjurmueshmërinë, deklarimin dhe certifikimin e produkteve, çështja do t’i referohet Prokurorisë së Shtetit për vlerësim dhe trajtim në kuadër të kompetencave të saj. Referimi nuk paragjykon përgjegjësinë penale, por synon që faktet dhe dokumentacioni i mbledhur të vlerësohen nga organi kompetent dhe, nëse konstatohen elemente të veprës penale, të ndërmerren veprimet e parashikuara me ligj.
Qëndrimi institucional është i qartë: qumështi duhet të jetë qumësht. Raporti i analizave të vetë AUV-së ka konstatuar yndyrë bimore me karakteristika të vajit të palmës, të padeklaruar, në produkte të tregtuara si qumësht. Nga momenti i këtij konstatimi, përgjegjësia institucionale nuk përfundon me rezultatin laboratorik. Ajo përfshin identifikimin dhe gjurmimin e produktit deri te loti dhe destinacioni i fundit, ndërmarrjen e masave ndaj produkteve të prekura, korrigjimin e proceseve të prodhimit dhe rikthimin e dokumentuar të operatorit në përputhshmëri të plotë me kërkesat ligjore.
23 °C
