Kosova e nis vitin pa buxhet dhe kështu institucionet e vendit janë të obliguar të punojnë me buxhet të vitit të kaluar.

Viti 2019 e gjeti Kosovën pa buxhet. Deputetët e Kuvendit të Kosovës e zvarritën Projektligjin për Buxhetin e këtij viti deri në dhjetor të vitit që lamë pas.

Tek në fund të vitit mezi e miratuan projektligjin në parim pa votat e deputetëve të dy partive më të mëdha opozitare, Lidhjes Demokratike të Kosovës dhe Lëvizjes Vetëvendosje.

Qëndrimet e opozitës për buxhetin e vitit 2019 kanë mbetur të njëjta si vitin e kaluar. Deputetët opozitarë, ata të Lidhjes Demokratike të Kosovës dhe të Lëvizjes Vetëvendosje, nuk janë lëkundur aspak nga qëndrimet e tyre sa i përket bojkotit të Projektligjit për Buxhetin.

Ndërkohë, përfaqësuesit e partive në pushtet janë të bindur se buxheti do të kalojë në lexim të dytë në janar të këtij viti.

Deputetja e Kuvendit të Kosovës nga radhët e Partisë Demokratike të Kosovës, Safete Hadërgjonaj, në një deklaratë dhënë gazetës “Zëri” ka treguar se janë shqyrtuar të gjitha kërkesat që kanë ardhur nga komunat, institucionet e nivelit qendror e deputetët sa i përket buxhetit të këtij viti.

Komento:

	Komenti