Numri i të prekurve nga koronavirusi po vazhdon të rritet gjithnjë e më shumë.

Ka shkuar në 803 numri i përgjithshëm i personave të vdekur nga koronavirusi, duke e kaluar shifrën e vdekjeve të shkaktuara nga virusi SARS në vitin 2003.

Zyrtarët shëndetësor në epiqendrën e virusit, në provincën Hubei të Kinës, njoftuan se vetëm në këtë rajon deri më tash kanë vdekur 780 persona. Vetëm dy nga 803 rastet fatale janë shënuar jashtë Kinës.

Në vitin 2003, 774 persona kishin vdekur nga virusi SARS (Sindromi i Ashpër Akut i Traktit Respirator) në dhjetëra shtete, shkruan “BBC”.

Më shumë se 34 mijë e 800 persona janë infektuar nga koronavirusi. Shumica e këtyre rasteve janë shënuar në Kinë, por virusi tashmë ka arritur edhe në Evropë, Australi dhe në Amerikën Veriore.

Vetëm gjatë 27 orëve të fundit, zyrtarët shëndetësor në Hubei raportuan për 81 persona të vdekur. Kështu, 801 vdekje deri më tash janë regjistruar në Kinë, një në Hong Kong dhe një tjetër në Filipine.

Autoritetet në Hong Kong kanë marrë vendim që të gjithë personat që vijnë nga Kina të vendosën në karantinë të obligueshme për një periudhë dyjavore.

Të shtunën, në Francë u konfirmuan pesë raste të reja të infektimit në rajonin Haute-Savoie, duke e çuar në njëmbëdhjetë numrin e përgjithshëm të personave të infektuar.

Komento:

	Komenti