Viktimizimi për situatën në Veri: Deklaratat e njëpasnjëshme të Vuçiqit dhe propaganda e tij për Kosovën.
Presidenti serb Vuçiç deklaroi të dielën në mbrëmje, pas vendimit të serbëve nga veriu i Kosovës që të tërhiqen nga institucionet e Kosovës për shkak të fillimit të zbatimit të planit të riregjistrimit të automjeteve, se ky nuk është as e para e as e fundit herë që, sipas tij, Serbia sulmohet për çështjen e Kosovës dhe se është e rëndësishme që tani ai të sillet seriozisht dhe me përgjegjësi.
Sigurisht që po flasim për ndryshime të mëdha politike, pothuajse tektonike, tha Vuçiç në një paraqitje në televizionin Pink, duke shtuar se vendimi i serbëve për t’u larguar nga institucionet e Kosovës është historik.
Ai theksoi se historitë se ata e kanë bërë këtë me urdhër të Beogradit janë të pakuptimta dhe se ata që e thonë këtë nuk duan të shohin se çfarë duan serbët dhe me çfarë problemesh po përballen.
Vuçiç thotë se mendon se është shumë e rëndësishme që njerëzit të dinë se çfarë ka kaluar Serbia në dekadat e mëparshme dhe në muajt e mëparshëm. Ai kujtoi se “në vitin 1999 Serbia e humbi de facto sovranitetin e saj në Kosovë dhe në vitin 2004 ndodhi një pogrom”.
Vuçiq me propagandë: Në qershor ka mundur të kishte gjakderdhje, shqiptarët “po përgatisnin” inkursion
Sipas tij “shqiptarët po përgatisni inkursion”, Vuçiq nuk e ka dhënë asnjë provë për këtë, gjatë një interviste televizive.
“Në fund të qershorit ishte e mundur që të kishte gjakderdhje, shqiptarët po planifikonin një inkursion në veri”, tha Vuçiq, transmeton Tanjug.
Sipas presidenti serb, “20 herë i ka penguar serbët që të mos ndalin nga institucionet”.
“Serbët kanë dashur të largohen nga institucionet sa herë që Prishtina ka bërë diçka, unë i kam këshilluar të mos e bëjnë këtë dhe ata më kanë dëgjuar, sepse kam qenë gjithmonë me popullin. Ata më besuan mua. I kam ndaluar të paktën 20 herë. Pastaj erdhi qershori dhe incidenti i parë. Është hera e parë që po flas për këtë, atë natë mund të ketë pasur një gjakderdhje të madhe, të paparë. Shqiptarët po e përgatisnin, serbët nuk donin të fshiheshin”, tha Aleksandar Vuçiq.
Vuçiq ka kërkuar sërish themelimin e Asociacionit të komumave me shumicë serbe. Sipas tij “Albin Kurti po sillet në formë të papërgjegjshme” duke iu referuar refuzimit për themelimin e Asociacionit njëetnik.
Marrëveshja e Brukselit “bleu 10 vjet paqe”
Ai ka kujtuar edhe politikën “standardet para statusit”, pas së cilës, siç thotë ai, pasuan vrasjet e serbëve dhe më pas shqiptarët u shpërblyen nga Perëndimi me njohjen e pavarësisë së shpallur në mënyrë të njëanshme.
Vuçiç beson se ishte një vendim i keq për të zhvendosur bisedimet me Prishtinën në BE dhe se ishte “gabimi më i madh që bëri Serbia”.
Ai thotë se marrëveshja e Brukselit “bleu 10 vjet paqe”, që çoi në rritjen e ekonomisë. Ai po ashtu thotë se një nga takimet e tij më të vështira me popullin serb ka qenë pas nënshkrimit të Marrëveshjes së Brukselit dhe po ashtu ka thënë se serbët duhet të tërhiqen nga institucionet e Prishtinës.
Presidenti i Serbisë tha gjithashtu se kur në gusht u mbajtën negociatat për dokumentet personale në Bruksel, një përfaqësues evropian dhe amerikan i kërkuan atij marrëveshje që atëherë dhe ata morën përsipër ta detyrojnë Albin Kurtin të heqë dorë nga riregjistrimi i targave.
Seancat e Qeverisë së Kosovës
Është mbledhur edhe qeveria e Kosovës, ku temë kryesore ka qenë situata dhe ngjarjet aktuale në vend.
“Duke theksuar rëndësinë e funksionimit normal të institucioneve dhe shërbimeve që ato ofrojnë, gjatë diskutimit u konfirmua se institucionet vartëse të secilës ministri kanë vazhduar të kryejnë detyrat e tyre në kuadër të kompetencave të tyre”, u tha pas një mbledhjeje të kabinetit Kurti.
Ky i fundit tha gjatë seancës se “ligjshmëria dhe kushtetutshmëria e Republikës nuk mund të cenohet, ndërsa dialogu dhe institucionet nuk kanë alternativë”. Ai përsëriti thirrjen për të mos “bojkotuar dhe braktisur institucionet e Kosovës që u shërbejnë të gjithëve pa dallim”.
“Qeveria e Kosovës mbetet e përkushtuar ndaj sundimit të ligjit, respektimit të të drejtave dhe lirive të njeriut dhe pakicave, barazisë, shërbimit ndaj qytetarëve, paqes dhe sigurisë”, përfundon njoftimi i qeverisë.
2 °C
