99 mijë të vaksinuar në Kosovë, Bardhi: Janë bërë të gjitha përgatitjet për vaksinimin masiv.

Koordinatori i Qendrës së Vaksinimit në Prishtinë, Niman Bardhi, tha se janë bërë të gjitha përgatitjet për fillimin e vaksinimit masiv që pritet të nis më 15 qershor.

“Për procesin e vaksinimit në masë nga 15 qershor fillon në nivel vendi, të gjitha masat janë ndërmarr ekipet mjekësore janë krijuar edhe infrastruktura është e gatshme dhe këtë pjesë nuk do ta kemi sfidues”, tha Bardhi.

Tutje, Bardhi tha se deri me tani kanë arritur të aplikojnë 99 mijë vaksina në nivel vendi.

“Aktualisht deri në këto qaste janë vaksinuar 250 persona në sallën ‘1 Tetori’, përderisa nëse flasim në nivel vendi deri më tani kemi mbi 650 vaksina të dhëna, por numri total deri tani ne kemi arritur në 99 mijë vaksina të aplikuara në nivel vendi”, theksoi ai.

Bardhi tha se nuk dihet kur do të fillojë vaksinimi për personat nën moshën 65 vjeçare, pasi që tha varet nga rekomandimet e komitetit.

“Ajo varet nga komenti kur del rekomandimi dhe pritet shumë shpejt pasi që e dini se nga data 15 qershor fillon vaksinimi masiv”, shtoi koordinatori i Qendrës së Vaksinimit, Niman Bardhi.

Presidentja e Kosovës, Vjosa Osmani-Sadriu dhe kryetari i Kuvendit, Glauk Konjufca janë vaksinuar kundër COVID-19, ku edhe kanë parë nga afër “përgatitjet për vaksinimin në masë që do të fillojë nga java e ardhshme”.

Presidentja Osmani, me këtë rast ka porositur të gjithë qytetarët që sapo të fillojë vaksinimi masiv, t’i përgjigjen ftesës për vaksinim të Ministrisë së Shëndetësisë.Edhe Konjufca, ka ftuar qytetarët që ta marrin vaksinën, sepse sipas tij, me vaksinim bëhet e mundshme hapja, rikthimi i normalitetit, por edhe stabiliteti i përgjithshëm.Në Kosovë, procesi i vaksinimit kundër COVID-19 ka nisur në fund të marsit.

Komento:

	Komenti