Procedurat për largimin e kryetarëve të komunave veriore në Kosovë, kanë nisur tre muaj nga marrja e mandatit. Grupi punues, përgjegjës për hartimin e Udhëzimit Administrativ po punon që ky Projekt – Udhëzim Administrativ të procedohet në Ministrinë e Administrimit të Pushtetit Lokal jo më larg se më 1 shtator teksa kryesuesi i këtij grupi punues, Besim Myrtezani, ka thënë për RTK se Udhëzimi Administrativ do të jetë gati në afatin e paraparë.
“Udhëzimi administrativ parasheh hapat të cilët do të ndërmerren, iniciativën do të ketë të drejtë ta marrin 1, 2 apo 3 qytetarë. Të sigurojnë 20 përqind e votuesve të asaj komune për të filluar procesi. Nëse qytetarët sigurojnë 20 përqind të votimeve të asaj komune atëherë procesi do të shkojë për votim i cili do të organizohet nga KQZ-ja për largimin e kryetarëve sipas vullnetit të qytetarëve. 20 përqind të votave duhet të sigurohen për të marr iniciativën pastaj 50 përqind plus 1 votë do të mundësojë largimin e kryetarëve nëse kjo do të arrihet”, tha ai.
Dy nga kryetarët e komunave preferojnë dorëheqjen para peticionit dhe për këtë Myrtezani u shpreh se nuk është më çështje e kryetarëve të komunave por e vullnetit të qytetarëve.
Ndër të tjera ai sqaroi se për largim të kryetarëve do të ketë proces të votimit, ndërsa 20 përqind e votave nevojiten vetëm për iniciativën e qytetarëve për largimin e kryetarëve.
“Për ta sqaruar, nuk është 20 përqind e votuesve që mund ta largojnë kryetarin e një komune. Duhet të jetë 50 përqind plus një votë për ta mundësuar largimin e kryetarit të komunës. 20 përqindshi është vetëm iniciativa ndërsa për largimin e kryetarit duhet të ketë proces të votimit për largim i cili duhet të ketë 50 përqind plus një votë për largim”, tha ai.
Largimi i kryetarëve të katër komunave veriore u hap rrugë zgjedhjeve të reja, për mbajtjen e të cilave Qeveria e Kosovës u dakordua me Bashkimin Evropian në takimin e Bratislavës.
12 °C
