Në Dhomat e Specializuara të Kosovës (DhSK) në Hagë, mbrojtja e ish-Presidentit Hashim Thaçi dhe ajo e Jakup Krasniqit kanë thënë se nuk do të jenë në gjendje që t’i paraqesin provat e tyre më 25 gusht 2025 ashtu siç është vendosur, pasi që iu duhet më shumë kohë. Mbrojtja pretendoi se tek çështja e paraqitjes së provave, nuk janë trajtuar njësoj sikurse Zyra e Prokurorit të Specializuar (ZPS).

“Parashtrojmë që ne nuk jemi në gjendje që të fillojmë me provat për klientin tonë për 25 gusht 2025 dhe arsyet për këtë do t’ua jap më vonë”, tha avokati i Jakup Krasniqit, Aiden Ellis, raporton “Betimi për Drejtësi“.

Në konferencën për ecurinë e çështjes, të martën, fillimisht avokati i Thaçit, Luka Mishetiq foli edhe për konferencën javore të mbajtur në janar të këtij viti, në të cilën ekipet e mbrojtjes së bashku kishin kërkuar dhjetë javë afat nga vendimi për mocionin sipas Rregullës 130, për t’u përgatitur për çështjen e tyre. Madje, sipas Mishetiq ky dhjetë-javësh ishte duke mos e llogaritur edhe pushimin e verës.

Mishetiq tha se edhe në konferencën e radhës që ishte mbajtur në shkurt të 2025-ës, mbrojtja e Veselit e përfaqësuar nga Rodney Dixson kishte kërkuar nga trupi gjykues të informohen nëse ishin të përshtatshme afatet e propozuara nga ata për paraqitjen e provave të tyre. Tha se trupi gjykues kishte thënë se në përgjithësi, këto afate ishin të pranueshme.

Mishetiq tha se ne ditët pasuese, trupi gjykues nuk ka dhënë asnjë njoftim, por ka ndryshuar qëndrimin e tij, duke përcaktuar afate për parashtrimin e provave të mbrojtjes- siç ishte ofrimi i listës së dëshmitarëve dhe provave materiale më 21 korrik 2025, si dhe ka përcaktuar datën për konferencën për përgatitjen e mbrojtjes për pjesën tjetër të gjykimit.

ZPS-ja kishte kërkuar ndryshim të afateve, por mbrojtja e kishte kundërshtuar. Mishetiq tha se kundërshtimi i mbrojtjes ishte rrëzuar përveç datës për konferencën përgatitore të mbrojtjes.

Mishetiq shtoi që sipas këtij urdhri, Thaçi si i akuzuari i parë në aktakuzë, është urdhëruar që të jetë gati t’i paraqes provat e veta nga 25 gushti 2025. Pra, sipas avokatit, çështja e mbrojtjes e cila ishte planifikuar që të fillonte më 15 tetor, të fillojë më 25 gusht 2025.

“E gjithë kjo është bërë pa asnjë lloj njoftimi nga shkurti deri në qershor, duke mos marrë fare parasysh vështirësitë që ka mbrojtja për përmbushjen e afateve përkatëse”, tha Mishetiq.

Mishetiq tha se trupi gjykues e ka ulur kohën për përgatitjen e mbrojtjes nga dhjetë në dy javë.

“Kjo ka krijuar shumë barrë të shtuar dhe vështirësi për ekipin tim i cili ka punuar dhe vazhdon të punojë rreh 12 orë në ditë në mënyrë të tillë që të mundohet të respektojë afatet përkatëse. Ne nuk jemi në dijeni në qoftë se trupi gjykues apo gjykatësi i procedurës paraprake e ka trajtuar ZPS-në në një mënyrë të tillë që ka vendosur afate për nxjerrjen e dokumenteve ose për fillimin e provave të ZPS-së, a ia dhënë ZPS-së mundësinë që të dëgjohet”, tha Mishetiq.

Ai tha se këto afate të vendosura për ata kanë shkaktuar shumë vështirësi në përgatitjen e ekipeve të mbrojtjes.

“Këto janë afate që kanë shkaktuar shumë vështirësi për përgatitjen e ekipeve të mbrojtjes dhe sikurse e kemi diskutuar edhe më herët ne duam që të na jepet mundësia që të shpjegohet se pse nuk na u është miratuar e drejta jonë për të pasur afatet kohore përkatëse”, tha Mishetiq.

Mbrojtja e Jakup Krasniqit e përfaqësuar nga Aiden Ellis iu bashkua parashtrimeve.

Prokurori Matt Halling tha se diskutimet për kërkesat që mbrojtja të përgatit çështjen e vet për dhjetë javë, duhet të tejkalohen.

Ndërsa, gjyqtari Guénaël Mettraux i tha mbrojtjes se në seancën e 1 tetorit 2024 kanë thënë se atyre iu duhen katër deri në gjashtë javë që të përgatiten për t’i paraqitur provat e tyre.

Mettraux tha se koha për përgatitjen e çështjes së mbrojtjes parashihet që të jetë dhjetë ditë në përputhje me Rregullën 130 pas nxjerrjes së vendimit mbi kërkesën sipas kësaj Rregulle. Tha se me kërkesë të mbrojtjes, u zgjat kjo periudhë kohore, duke iu dhënë gjashtë herë më shumë kohë se sa që është parashikuar në rregullore.

Ndryshe, në seancë prezent janë në sallë Hashim Thaçi, Kadri Veseli, Rexhep Selimi. Ndërsa, Jakup Krasniqi është i pranishëm përmes video-lidhjes, duke përfshirë edhe një avokate të Veselit dhe atë të Krasniqit.