Presidentja e vendit, Vjosa Osmani ka zhvilluar sot një vizitë në Gjilan, të cilën e ka cilësuar si një ditë të mbushur me energji, kreativitet dhe frymëzim.

Përmes një postimi në Facebook, Osmani ka njoftuar se ka uruar kryetarin e Gjilanit, Alban Hyseni, për mandatin e tij të dytë, me të cilin ka bashkëbiseduar për projektet që synojnë të sjellin më shumë zhvillim dhe mundësi të reja për qytetin, raporton Klankosova.tv.

“Urova Kryetarin Alban Hyseni për mandatin e tij të dytë dhe bashkëbiseduam për projektet që do t’i japin qytetit më shumë zhvillim dhe mundësi të reja.

Së bashku kaluam çaste të paharrueshme në Shkollën e Muzikës dhe të Arteve Pamore, me disa performanca frymëzuese nga Kori i grave ‘Muza’, si dhe në mesin e më të vegjëlve e më të ëmbëlve, në kopshtin IP “Integj”, shkroi e para e shtetit.

Osmani ka vizituar po ashtu kompaninë InterPLAST TROCAL, ku në kuadër të vizitës, ajo u ndal edhe në Klubin e Futbollit “Drita”, të cilin e përgëzoi për arritjet në garat vendore dhe ato evropiane, duke theksuar se po e përfaqëson Kosovën me dinjitet.

“Po ashtu, dëgjuam për sukseset e kompanisë InterPLAST TROCAL, si lidere në rajon dhe një shembull i shkëlqyer i punës së mirë, inovacionit dhe vizionit që e çojnë shtetin tonë përpara.

Vizituam edhe klubin e futbollit “Drita”, të cilët i përgëzova për rezultatet në nivel shtetëror, e posaçërisht në garat evropiane, në të cilat po na bëjnë krenarë të gjithëve.

Faleminderit Gjilan”, shkroi Osmani. /Klankosova.tv