Komuna e Prishtinës në bashkëpunim me Odën Ekonomike Amerikane në Kosovë, ka organizuar takim për të shqyrtuar alternativat e financimit të projekteve strategjike të prezantuara gjatë Konferencës së Investitorëve Amerikanë 2026.

Kryetari i komunës së Prishtinës, Përparim Rama ka prezantuar projektet që janë planifikuar për kryeqytetin.

Disa prej tyre janë stacioni i autobusëve, fshati olimpik si dhe unaza e qytetit.

“Pjesë e zonës qendrore, Zhvillimi Qendror i Prishtinës – Stacioni i Autobusëve, një zhvillim me funksione të përziera. Edhe këtu kemi planet rregullative të miratuara. Nga pikëpamja komunale i kemi të gjitha të përgatitura, por na duhen propozime nga investitorët. Ajo që po kërkojmë është e qartë: e dimë që na duhet një stacion autobusi, e dimë që na duhet parkim nëntokësor për makina, dhe pjesa tjetër mund të klasifikohet si zhvillim me përdorime të përziera. Qytetit i duhen hotele, i duhen hapësira administrative; qytetit jo gjithmonë i nevojiten banesa, por mund të përfshihet edhe akomodim me qira të nivelit të lartë. Sidoqoftë, sektori privat duhet të dalë me propozimet e veta.

Ajo që po themi është se, duke qenë se kemi më shumë se një palë të interesuar — rreth pesë apo gjashtë investitorë që duan ta marrin të gjithë projektin — mendojmë se në vend që një i vetëm ta marrë të gjithin, mund ta ndajmë në pesë ose gjashtë pjesë dhe të punojmë paralelisht. Pra, kemi një masterplan dhe pastaj i ndajmë parcelat. Kështu do të ecim përpara.”, tha Rama.

Për fshatin Olimpik, i pari i kryeqytetit tha se i është kërkuar Qeverisë qysh para katër viteve prona, mirëpo nuk i është dhënë dhe sipas tij ky rrezik mbetet prapë.

“Fshati Olimpik këtu rreth 35% e tokës është në pronësi të komunës, rreth 65% është në pronësi të qeverisë qendrore. Ne i kemi kërkuar qeverisë qendrore që ta kalojë këtë pronë tek ne rreth katër vite më parë, por kjo nuk ka ndodhur ende. Pra, rreziku mbetet. Ne kemi mënyra se si mund ta realizojmë këtë. Ky projekt gjithashtu duhet të kalojë Planin Zhvillimor Komunal, gjë që do ta bëjmë. Kështu që ka pjesë që mund të realizohen menjëherë dhe pjesë të tjera që mund të vonohen. Kjo është situata aktuale. Kemi një masterplan dhe shumë studime fizibiliteti që mund t’i ndajmë”, tha Rama.

Ndërkaq për disa projekte Rama tha se tashmë është investuar dhe disa të tjera janë në plan.

“Te Unaza e Qytetit, BERZH tashmë po investon dhe janë shumë të interesuar. Na duhet vetëm që Plani Zhvillimor Komunal të miratohet për ta pozicionuar saktë projektin, dhe më pas mund të ecim përpara. Me Planin Zhvillimor Komunal kemi një proces që e quajmë tokenizim në kuadër të shpronësimit të tokës. Kështu që nuk kemi nevojë të paguajmë; mund ta tokenizojmë dhe t’u lejojmë të ndërtojnë në zona të tjera. Për Parkun Eko-Industrial dhe Qendrën Kreative kemi një studim shumë të detajuar fizibiliteti. Toka është në bashkëpronësi; një pjesë është komunale dhe një pjesë është e qeverisë qendrore. Kërkohet një Plan Zhvillimor Komunal për të përcaktuar që po, ky është lokacioni, dhe pastaj mund të ecim përpara”, tha Rama./eo