Vetëm anëtarët e familjes do të marrin pjesë sot në varrimin e Ajatollah Ali Khameneit në Mashhad, raportuan mediat shtetërore, duke rritur pritjet për paraqitjen e parë publike të Mojtaba Khameneit si udhëheqës suprem, shkruan CNN.

Dalja e tij do të shënonte paraqitjen e parë të njohur publike të Khameneit që nga emërimi i tij si udhëheqësi i ri suprem i Iranit, pas vrasjes së babait të tij në një sulm izraelit në fund të shkurtit, të koordinuar me Shtetet e Bashkuara, një sulm që shkaktoi një luftë dyzetditore.

Megjithatë, pavarësisht njoftimit, mbetet e paqartë nëse Khamenei i ri do të marrë pjesë në varrimin e të atit, pas mungesës së tij të plotë gjatë një jave ceremonish. Mediat shtetërore nuk i përmendën në mënyrë të qartë pjesëmarrësit, ndërsa vëllezërit e tij – Mostafa, Masoud dhe Meysam – kanë përfaqësuar familjen gjatë procesioneve të javës së kaluar.

Kërcënimet ndaj sigurisë janë shtuar gjithashtu që nga rifillimi i luftimeve mes Washingtonit dhe Teheranit, ndërsa Izraeli tha javën e kaluar se udhëheqësi suprem është në “shënjestër për t’u vrarë”.

Besohet se është plagosur gjatë sulmeve të shkurtit nga Izraeli dhe SHBA-ja, ndërsa udhëheqësi i ri suprem ka qëndruar i fshehur që nga fillimi i luftës, duke komunikuar me mbështetësit vetëm përmes deklaratave me shkrim dhe pa u shfaqur asnjëherë në publik apo pa përdorur zërin e tij.

Gjatë javës së kaluar, turma të mëdha njerëzish në zi kanë mbushur rrugët e pesë qyteteve në dy vende për t’i dhënë lamtumirën e fundit Ajatollah Ali Khameneit në një ceremoni madhështore mortore që zgjati një javë.