Takimi i radhës mes kryetarit të Lëvizjes Vetëvendosje, Albin Kurti, dhe kryetarit të Lidhjes Demokratike të Kosovës, Lumir Abdixhiku, ka shënuar një fazë të re në përpjekjet për gjetjen e një presidenti konsensual të Kosovës.

Pas më shumë se dy orësh bisedime, të dy liderët konfirmuan se procesi tashmë ka kaluar nga diskutimi për parimet dhe kriteret e presidentit te emrat konkretë të kandidatëve të mundshëm. shkruan Gazeta Online Reporteri.

Ky është zhvillimi kryesor i takimit, por njëkohësisht edhe pjesa më e ndjeshme e negociatave. As Kurti e as Abdixhiku nuk pranuan të bëjnë publikë emrat, duke argumentuar se procesi duhet të mbetet konfidencial deri në arritjen e një dakordimi të plotë.

Abdixhiku tha se palët kanë diskutuar disa emra dhe se, në tërësi, kandidatët e propozuar janë në përputhje me parimet e dakorduara më herët.

“Pas dakordimit rreth parimeve për presidentin apo presidenten e ardhshme të Republikës së Kosovës, sot kemi vazhduar me diskutime rreth emrave konkretë”, tha Abdixhiku.

Sipas tij, kalimi nga parimet te emrat është një hap i rëndësishëm përpara.

“Në tërësinë e emrave të prezantuar, mund të them me bindje të plotë se të gjithë emrat, në masë të madhe, dikush më shumë e dikush më pak, janë në vijë me parimet e dakorduara deri më tani. Dhe në këtë drejtim, ky është një hap përpara”, deklaroi ai.

Në anën tjetër, Kurti e përshkroi diskutimin si të hapur, të sinqertë dhe serioz, duke konfirmuar se edhe LVV-ja ka sjellë në tavolinë emra konkretë.

“Është hera e parë që kemi diskutuar me dhe për emra të përveçëm”, tha Kurti.

Ai shpjegoi edhe mënyrën se si po zhvillohet negociimi. Sipas tij, lista e kandidatëve mund të zgjerohet sa herë që njëra palë propozon një emër të ri, por mund të ngushtohet kur bëhet e qartë se për një kandidat nuk mund të arrihet pajtim.

“Lista e atyre emrave zvogëlohet atëherë kur është e qartë se nuk do të mund të ketë dakordim për ndonjë emër të përveçëm”, tha Kurti.

Emrat ekzistojnë, por ende nuk dihet kush janë

Pikërisht këtu qëndron një prej elementeve më të rëndësishme të negociatave. Të dy liderët konfirmuan ekzistencën e emrave konkretë, por refuzuan të japin edhe numrin apo karakteristikat e tyre.

Abdixhiku tha se nuk mund të flasë për emrat në këtë fazë dhe paralajmëroi se takimet do të vazhdojnë.

“Ju lus për mirëkuptim: nuk mund të diskutoj për emra konkretë në këtë fazë, por do të takohemi sërish për të finalizuar dhe për të zgjedhur presidentin e ardhshëm të Republikës së Kosovës”, tha ai.

Edhe Kurti insistoi në ruajtjen e konfidencialitetit, duke bërë të qartë se kandidatët e diskutuar nuk janë kontaktuar paraprakisht për të marrë pëlqimin e tyre.

“Nuk janë emra të cilët ne i kemi pyetur paraprakisht se a do të pranonin apo se dëshironin që të jenë president ose presidente të Republikës, sepse paraprakisht duhet të dakordohemi ne ndërmjet vete”, tha Kurti.

Kjo nënkupton se procesi aktual është ende në fazën e përzgjedhjes politike të emrave dhe jo në fazën e marrjes së pëlqimit formal nga kandidatët e mundshëm.

Abdixhiku: LDK-ja nuk është vagon i asnjë partie

Një pjesë tjetër e rëndësishme e deklaratës së Abdixhikut lidhej me pozicionimin e LDK-së në raport me LVV-në.

Abdixhiku e bëri të qartë se partia e tij nuk dëshiron që negociatat të interpretohen si nënshtrim ndaj ndonjë subjekti tjetër politik.

“LDK-ja është e LDK-së. Vetëm e anëtarësisë së LDK-së. Mësohuni me një LDK të tillë, ju lutem”, tha ai.

Kreu i LDK-së theksoi se partia e tij po merr pjesë në negociata mbi bazën e bindjeve të veta dhe jo si pjesë e një marrëveshjeje më të gjerë politike.

Në këtë kuadër, ai përsëriti se LDK-ja nuk kërkon poste apo përfaqësim institucional në këmbim të mbështetjes për presidentin.

“LDK-ja nuk kërkon asgjë mbrapa, domethënë vetëm stabilitet institucional”, deklaroi Abdixhiku.

Kjo deklaratë është e rëndësishme për mënyrën se si LDK-ja po e ndërton publikisht rolin e saj në këtë proces: si palë negociuese për një çështje konkrete kushtetuese dhe jo si subjekt që po negocion ndarjen e pushtetit.

Kurti: Nuk janë negociata maratonike, kemi javë, do të donim ditë

Edhe Kurti dha një sinjal se procesi nuk duhet të zvarritet pafundësisht.

Ai e përjashtoi mundësinë që negociatat të shndërrohen në një proces shumëmujor.

“Nuk do t’i kisha quajtur negociata maratonike. Natyrisht që nuk janë as distanca të shkurtra apo sprint, nëse flasim me gjuhën e atletikës, por nuk janë as maratonike”, tha Kurti.

Sipas tij, bëhet fjalë për një proces që duhet të zhvillohet brenda javësh.

“Është çështje javësh, e do të dëshironim që të ishte çështje ditësh”, deklaroi ai.

Kurti bëri të ditur se komunikimi mes palëve do të vazhdojë dhe se takimet e tjera pritet të pasojnë.

Të dy flasin për stabilitet, por rruga drejt marrëveshjes mbetet e vështirë

Edhe Kurti edhe Abdixhiku e lidhën procesin e zgjedhjes së presidentit me nevojën për stabilitet institucional.

Abdixhiku tha se LDK-ja dëshiron të jetë “zë i arsyes” në një situatë ku, sipas tij, ka shumë zëra për destabilitet.

“Duam të jemi zë të arsyes për këtë stabilitet”, tha ai.

Ndërsa Kurti argumentoi se një marrëveshje për presidentin është e domosdoshme për të shmangur përsëritjen e një cikli të ri zgjedhor.

“Ne nuk jemi duke pritur, jemi duke punuar ditë e natë që të arrijmë te një marrëveshje politike”, tha Kurti.

Ai shtoi se ekzistojnë numrat për konstituimin e Kuvendit dhe formimin e Qeverisë, por sipas tij, kjo nuk e zgjidh problemin nëse nuk gjendet një emër konsensual për president.

“Numrat janë për ta konstituar Kuvendin dhe për ta formuar Qeverinë edhe brenda ditës, mirëpo krejt kjo është e kotë, nëse nuk kemi emër për president konsensual kushtetues i cili do të zgjidhej nga Kuvendi”, deklaroi Kurti.

Paralajmërimi për zgjedhje të reja

Në deklaratat e të dy liderëve ishte e pranishme edhe frika nga një tjetër cikël zgjedhor.

Abdixhiku tha se LDK-ja po përpiqet të shmangë një situatë ku mungesa e marrëveshjes për presidentin do ta çonte vendin sërish drejt zgjedhjeve.

“Gjëja më e lehtë që mund ta bëjmë është të mos përpiqemi, atëherë zgjedhjet i kemi të garantuara”, tha ai.

Edhe Kurti iu referua zgjedhjeve të 7 qershorit dhe paralajmëroi se përsëritja e një situate të tillë nuk do të ishte në interes të vendit.

“Unë nuk besoj që ka dikush i cili nxitohet për ta përsëritur atë çfarë ka ndodhur me 7 qershor edhe në një muaj të vjeshtës a dimrit”, tha Kurti.

Në këtë pikë, pavarësisht dallimeve politike, të dy liderët duket se kanë një interes të përbashkët: të shmangin një tjetër krizë institucionale dhe zgjedhje të reja, duke gjetur një formulë për presidentin.

Kurti: Nuk besoj se po e shkelim Kushtetutën

Kurti u pyet edhe për moskonstituimin e Kuvendit dhe nëse kjo situatë mund të konsiderohet shkelje e Kushtetutës.

Ai tha se nuk beson se Kushtetuta është shkelur, duke u bërë thirrje atyre që kanë dyshime ta adresojnë çështjen në Gjykatën Kushtetuese.

“Kushdo që konsideron se ka pasur shkelje kushtetuese, mund t’i drejtohet Gjykatës Kushtetuese”, tha Kurti.

Sipas tij, deputetët kanë dhënë betimin dhe mbeten deputetë të Republikës së Kosovës, edhe pse Kuvendi nuk është konstituuar.

“Na duhet marrëveshja politike, nuk besoj se po e shkelim Kushtetutën”, deklaroi ai.

Kurti e krahasoi situatën aktuale edhe me vitin e kaluar, duke thënë se atëherë Kuvendi ishte konstituuar rreth gjashtë muaj pas zgjedhjeve.

“Prej 9 shkurtit deri më 26 gusht janë më shumë se gjashtë muaj. Tash janë më pak se tre muaj prej zgjedhjeve”, tha ai.

Çështja e Thaçit, e ndarë nga negociatat për Presidentin

Kurti u pyet edhe për mundësinë që Hashim Thaçi të jetë kandidat për president në rast të lirimit të tij nga Haga.

Ai tha se beson në luftën e UÇK-së dhe në pafajësinë e ish-krerëve të saj, por këmbënguli se kjo çështje nuk duhet të lidhet me negociatat aktuale me LDK-në.

“Ne shpresojmë më të mirën, dëshirojmë që të na kthehen në Kosovë të lirë, besojmë në pafajësinë e tyre dhe kjo është kryesorja”, tha Kurti.

Megjithatë, ai e bëri ndarjen mes çështjes së ish-krerëve të UÇK-së dhe procesit politik për zgjedhjen e presidentit.

“Procesi i negociatave me Lidhjen Demokratike të Kosovës për kandidatin për president ose presidente është një proces i ndarë, është proces politik dhe jo i drejtësisë”, tha Kurti.

Negociatat tani hyjnë në fazën më të vështirë

Takimi i fundit ka prodhuar një zhvillim konkret: emrat për presidentin tashmë janë në tavolinë.

Por fakti që të dy liderët refuzojnë t’i bëjnë publikë emrat tregon se marrëveshja ende nuk është afër finalizimit. Përkundrazi, vetë Kurti pranoi se faza e re është më e vështirë, pasi tashmë duhet të negociohet për individë konkretë dhe jo më vetëm për kritere abstrakte.

Parimet për profilin e presidentit tashmë janë dakorduar. Tani sfida është që njëri prej emrave të mundshëm të marrë mbështetjen e të dyja palëve.

Kurti dhe Abdixhiku kanë konfirmuar se komunikimi do të vazhdojë dhe se takime të tjera do të zhvillohen.

Komento:

	Komenti