Partia për Veprim Demokratik (PDD) e Shaip Kamberit, Partia Demokratike e Shqiptarëve (PDSH) e Ragmi Mustafës nga Presheva, Lëvizja për Progres Demokratik (PDP) e Shqiprim Muslit dhe Bashkimi Demokratik i Shqiptarëve (DUA) arritën marrëveshje për koalicion për zgjedhjet parlamentare të planifikuara për 17 dhjetor në Serbi, transmeton FrontOnline.

Bartësi dhe i pari në listën zgjedhore të këtij koalicioni do të jetë kreu i PDD-së, Shaip Kamberi.

Lista do të quhet “Lufta politike e shqiptarëve vazhdon” – Shaip Kamberi, dhe siç dihet do të mbështetet nga grupi joformal Aleanca për Luginën, ku ndër të tjera bënë pjesë edhe ish-anëtari i Alternativës për Ndryshim Shqiprim Arifi.

Partnerët e koalicionit ende lënë mundësinë që partitë e tjera shqiptare t’i bashkohen nëse janë dakord me këtë koncept politik.

Kjo konfirmon se Nagip Arifi dhe Partia e tij Demokratike do të ndryshojnë kampin dhe do të marrin pjesë në këto zgjedhje së bashku me Alternativën për Ndryshim.

Nesër është planifikuar një takim tjetër i liderëve shqiptarë nga jugu i Serbisë me ministrin e Jashtëm të Shqipërisë, si përpjekja e fundit e Tiranës për të bashkuar të gjitha partitë në një listë. Megjithatë, gjasat që një gjë e tillë të ndodhë janë jashtëzakonisht të vogla.

Kujtojmë se më 8 nëntor, kryeministri i Kosovës Albin Kurti priti gjashtë nga shtatë kandidatët shqiptarë për deputetë në zgjedhjet në Serbi që do të mbahen më 17 dhjetor dhe konkluzioni i përbashkët i takimit ishte se një listë e vetme ndihmon shumë në përfaqësimin më të mirë të shqiptarëve në jetën politike të Serbisë. Megjithatë, në atë kohë nuk u arrit marrëveshje për pjesëmarrjen e përbashkët të të gjitha partive në zgjedhjet parlamentare./FrontOnline/

 

Komento:

	Komenti