Avokati Bozho Preleviq tha sot se autoritetet në Beograd, të udhëhequr nga Aleksandar Vuçiq, nuk guxojnë ta arrestojnë Milan Radoiçiqin sepse e dinë se ai nuk e ka organizuar konfliktin në Banjskë më 24 shtator, transmeton FrontOnline.

Duke komentuar lëshimin e urdhër-arrestit të Interpolit kundër ish-nënkryetarit të Listës Serbe dhe bashkëpunëtorit më të afërt të Vuçiqit për çështjen e Kosovës Preleviq tha për agjencinë Beta se Radoiçiq mund të jetë një dëshmitar i papërshtatshëm për qeverinë aktuale.

Sipas tij, për Serbinë do të ishte problem të mos vepronte me urdhër të Interpolit në momentin “kur dihet se kush po e mbron Radoiçiqin në Serbi”.

“Milan Radoiçiq mbrohet dhe ruhet nga presidenti i Serbisë, Aleksandar Vuçiq. Qeveria në mënyrë të ngathët dhe të dëmshme për këtë vend u përpoq të mbrohej nga ngjarjet në Banjskë duke nisur procedurën kundër Radoiçiqit dhe duke e liruar menjëherë. Shtrohet pyetja se kush është përgjegjës për të gjitha ngjarjet tragjike në Banjskë, sepse Radoiçiq sigurisht nuk mund të kishte siguruar një sasi të madhe armatimi, pajisje ushtarake, madje edhe një automjet luftarak”, tha Preleviq.

Ai ka theksuar se Radoiçiq nuk është objektivi kryesor i Interpolit

“Autoritetet në Serbi gjithashtu e dinë se Radoiçiq nuk është objektivi kryesor i Interpolit, por ai mund të tregojë objektivin e duhur. Prandaj nuk ka asnjë procedurë hetimore në Beograd në lidhje me Banjskën. Nëse prokuroria do të bënte punën e saj, do të përfundonte dëmet kolosale që kanë bërë interesat serbe në Banjskë, Banjska është pika e kthesës pas së cilës nuk ka më rezistencë në Veri të Kosovës”, ka vlerësuar Preleviq.

Preleviq shtoi se urdhër-arresti i Interpolit ka edhe një konotacion politik.

“Sipas Kushtetutës së Serbisë dhe Rezolutës 1244, është e vështirë të kuptohet bashkëpunimi i Serbisë përmes Interpolit me Kosovën, sepse mund të jetë në favor të njohjes eksplicite të pavarësisë së Kosovës. Nga ana tjetër, të gjithë deputetët e Listës Serbe janë betuar në Kuvendin e Kosovës se do të respektojnë Kushtetutën dhe ligjet e Kosovës, kështu që para Interpolit integriteti territorial i Serbisë është cenuar në mënyrë drastike nga përfaqësuesit e Listës Serbe. Nga aspekti politik, me kërkesën e Interpolit do të ishte një pranim nga shteti i Serbisë se Kushtetuta nuk vlen në këtë rast”, tha avokati.

Preleviq beson se autoritetet në Beograd as nuk do ta arrestojnë dhe as nuk do ta dorëzojnë Radoiçiqin tek autoritetet kosovare dhe se Serbia do të përballet me pasoja të rënda për këtë.

“Nuk mund të flitet për një vend me sundim të ligjit në rast të mosrespektimit të urdhrave të Interpolit. Nuk bëhet fjalë vetëm për arrestimin dhe ekstradimin eventual të Radoiçiqit, por edhe pse nuk zhvillohen procedura kundër tij në Beograd. Një qëndrim i tillë i pushtetit aktual dërgon mesazhin se në Serbi është e mundur që një grup i armatosur për shkak të të cilit do të vdesin dhe plagosen shumë njerëz dhe se kjo nuk përfaqëson asgjë për qeverinë. Mosveprimi i prokurorisë në rastin Banjska tregon se ajo nuk ishte ide e Radoiçiqit”, ka përfunduar Preleviq.

Organizata ndërkombëtare policore Interpol ka lëshuar fletarrest për ish-nënkryetarin e Listës Serbe, Milan Radoiçiq dhe 11 persona të tjerë për shkak të ngjarjeve tragjike të ndodhura më 24 shtator në Banjska, në Veri të Kosovës.

Meqenëse Kosova nuk është anëtare e Interpolit, urdhër-arrestet ndërkombëtare lëshohen përmes UNMIK-ut.

Nenad Rashiq, Ministër për Komunitete dhe Kthim në Qeverinë e Kosovës, ka konfirmuar se është lëshuar urdhër arresti.

“Po, është e vërtetë. Nga Ministria e Punëve të Brendshme të Kosovës është konfirmuar se për Milan Radoiçiqin është lëshuar fletarrest i Interpolit”, tha Rashiq.

Radoiçiq mori përgjegjësinë për ngjarjet në Banjskë të 24 shtatorit, kur në orët e mëngjesit pati një konflikt të armatosur me Policinë e Kosovës.

Në atë kohë mbeti i vrarë polici i Kosovës Afrim Bunjaku, një tjetër u plagos, ndërsa u vranë edhe tre serbë dhe disa të tjerë u plagosën nga grupi i drejtuar nga Milan Radoiçiq./FrontOnline/

Komento:

	Komenti