Sot në Asamblenë Parlamentare të Këshillit të Evropës (APKiE), po diskutohet mbi sulmin terrorist të 24 shtatorit në veri të Kosovës.

Shefi i Grupit Parlamentar, Arben Gashi, në fjalën e tij në APKiE, ka thënë se Serbia e ka përkrahur këtë sulm terrorist dhe e ka pajisur këtë grup paraushtarak me armë, municion dhe mjete të tjera për kryerjen e këtij akti terrorist, raporton Gazeta Blic.

Ai ka bërë thirrje për një hetim ndërkombëtar të plotë dhe të paanshëm për ekzistencën e kampeve të trajnimit për terroristët në Serbi dhe po ashtu ka bërë thirrje që Serbia t’i largojë trupat e saj ushtarake nga kufiri me Kosovën, pasi sipas tij, prania e tyre ka potencial të përshkallëzojë tensionet dhe të rrezikojë paqen e brishtë në rajon.

Gashi ka shtuar se dialogu dhe diplomacia paqësore janë mjetet më efektive për zgjidhjen e mosmarrëveshjeve.

Fjalimi i tij i plotë:

Në kohë errësirë dhe dëshpërimi, është detyra jonë të qëndrojmë së bashku, të përballemi me pasojat shkatërruese të sulmeve terroriste dhe të gjejmë shpresën në ndjekjen e paqes.

Më 24 shtator në fshatin Banjskë të Komunës së Zveçanit, në Republikën e Kosovës është kryer një sulm terrorist, ndërsa një grup terroristësh të armatosur, të veshur me uniformë dhe maska kanë vrarë një polic dhe kanë plagosur dy të tjerë dhe jo vetëm.

Serbia, si shtet anëtar i këtij institucioni të madh, e ka përkrahur dhe e ka pajisur këtë grup paraushtarak me armë, municion dhe mjete të tjera për kryerjen e këtij akti terrorist.

Serbia ende vazhdon t’i mbështesë ata, pasi të gjithë terroristët e përfshirë në këtë sulm janë të fshehur në Serbi.

Përballë një ngjarjeje kaq të rëndë, është përgjegjësia jonë që të dënojmë pa mëdyshje terrorizmin ndaj mbështetësve të tij në të gjitha format e tij.

Ne nuk duhet të lejojmë terroristët të minojnë përparimin që kemi bërë në ndërtimin e një shoqërie paqësore të bazuar në parimet e demokracisë, të drejtave të njeriut dhe shtetit të së drejtës.

Për më tepër, ne bëjmë thirrje për një hetim ndërkombëtar të plotë dhe të paanshëm për ekzistencën e kampeve të trajnimit për terroristët në Serbi. Prania e objekteve të tilla nuk është vetëm një shkelje e normave ndërkombëtare, por edhe një kërcënim i drejtpërdrejtë për sigurinë rajonale dhe globale.

Së bashku, me anëtarët e Këshillit të Evropës, ne duhet të solidarizohemi kundër terrorizmit dhe të punojmë pa u lodhur për të siguruar që përgjegjësit të sillen para drejtësisë në Kosovë.

Për më tepër, i bëjmë thirrje Serbisë që të largojë trupat e saj ushtarake nga kufiri me Kosovën. Ky veprim nuk është vetëm thelbësor për stabilitetin rajonal, por edhe në përputhje me marrëveshjet ndërkombëtare dhe parimet e paqes dhe sigurisë.

Prania e trupave ushtarake në kufirin e Kosovës ka potencial të përshkallëzojë tensionet dhe të rrezikojë paqen e brishtë në rajon. Ne besojmë fuqimisht se dialogu dhe diplomacia paqësore janë mjetet më efektive për zgjidhjen e mosmarrëveshjeve dhe për të garantuar sigurinë e të gjitha palëve të përfshira.

Vendosmëria jonë kolektive për të luftuar terrorizmin, për të mbështetur vlerat e Këshillit të Evropës dhe për të siguruar një të ardhme më të sigurt për të gjithë mbetet e palëkundur. Le të ecim përpara me vendosmëri dhe unitet, të udhëhequr nga parimet e drejtësisë dhe paqes.

https://streamable.com/vs6pma 

Komento:

	Komenti