Ministri i Jashtëm i Iranit thotë se Teherani nuk dëshiron që konflikti me Izraelin të zgjerohet në një luftë më të gjerë rajonale “përveç nëse na imponohet”.

Abbas Araghchi shtoi se vendi i tij kishte qenë gati të vazhdonte negociatat bërthamore me SHBA-në, por sulmet e Izraelit të premten kishin ndërprerë ato bisedime dhe treguan “kundërshtimin e Izraelit ndaj çdo forme negociate”.

“Është absolutisht e qartë se regjimi izraelit nuk dëshiron asnjë marrëveshje për çështjen bërthamore; nuk dëshiron negociata dhe nuk dëshiron diplomaci”, tha Araghchi në një takim me ambasadorët e huaj të transmetuar në mediat shtetërore. “Sulmi ndaj Iranit në mes të bisedimeve bërthamore tregon qartë kundërshtimin e regjimit izraelit ndaj çdo forme negociate”.

Araghchi tha se sulmet e Iranit ndaj Izraelit kanë synuar si infrastrukturën ushtarake ashtu edhe atë ekonomike dhe kritikoi sulmet e Izraelit ndaj rafinerive petrokimike iraniane si rrezik për një konflikt më të gjerë rajonal.