Kosova po bëhet me një super stadium.

Kryetari i komunës, Agim Bahtiri, i shoqëruar nga nënkryetari Faruk Mujka, dhe drejtori për Kulturë, Rini dhe Sport, Tafil Peci, sot janë takuar në ambientin e stadiumit “Adem Jashari” në Mitrovicë me drejtorin e Departamentit të Sportit në kuadër të Ministrisë së Kulturës, Rinisë dhe Sportit, Iber Alaj, si dhe mbikëqyrësit dhe hartuesit e projektit për renovimin e këtij stadiumi.

Qëllimi i këtij takimi ishte diskutimi rreth fazave dhe mënyrave se si do të fillojnë me zhvillimin e punimeve në këtë stadium, punimet e të cilit parashihen të fillojnë në ditët në vijim.

Gjatë këtij takimi përfaqësuesit nga MKRS-ja dhe hartuesit e projektit potencuan se fillimisht punimet do të zhvillohen nga pjesa e brendshme e stadiumit, duke bërë rregullimin e fushës, demolimin e tribunave si dhe pjesët e tjera brenda këtyre hapësirave.

Me këtë rast kryetari i komunës, Agim Bahtiri, ofroj mbështetjen e tij të plotë në realizimin e këtij projekti, duke kryer të gjitha procedurat komunale, si dhe lirimin e pronave, në mënyrë që punimet të zhvillohen pa ndonjë ngecje dhe të krijohen kushte sa më moderne për sportistët tanë.

Vlen të theksohet se projekti për renovimin e stadiumit “Adem Jashari” do të kushtojë mbi 12 milionë euro, i cili përfshin renovimin e tërësishëm të stadiumit, parking publik, parkingun për VIP, parkingun për media, park rekreativ, amfiteatër të hapur, fushat tjera ndihmëse si dhe hapësirën për tifozët mysafir, dhe pritet të përfundojë brenda 18 muajve.

Komento:

	Komenti