Qeveria po punon në krijimin e Institutit që do dokumentojë krimet e kryera gjatë luftës.

Kryeministri Albin Kurti thotë se Qeveria pret angazhim më të madh në ndjekjen e krimeve të luftës.

Ai përmes një postimi në Facebook, ka shtuar se brenda vitit në Kosovë është shtuar buxheti për rritjen e numrit të prokurorëve special dhe bashkëpunëtorëve profesionalë.

Kreu i ekzekutivit thotë më tej se po punojnë në krijimin e Institutit që do dokumentojë krimet e kryera gjatë luftës, shkruan Reporteri.net.

Postimi i tij:

“Kodi i Procedurës Penale i Republikës së Kosovës mundëson gjykimin në mungesë. Para tri vitesh, kërkesa e pashtershme për drejtësi për viktimat, ka sjellë deri te miratimi i një norme të këtillë juridike që mundëson mbarëvajtje të procesit gjyqësor pa praninë e të akuzuarit.

Qeveria pret angazhim me të madh në ndjekjen e gjykimin e krimeve të luftës. Për këtë, brenda vitit të parë kemi shtuar buxhetin për rritjen e numrit të prokurorëve special dhe bashkëpunëtorëve profesionalë.

Po ashtu, po punojmë në krijimin e Institutit që do dokumentojë krimet e kryera gjatë luftës, e po punojmë zellshëm në hartimin e strategjisë për drejtësinë tranzicionale.

Krimet e luftës nuk parashkruhen, por ditët e vitet ikin shpejtë. Me këto ikin edhe ata të cilëve shteti u ka borxh vënien e drejtësisë për familjarë të vrarë e për dhimbjen e papërballueshme e cila po mbetet pa përgjigje.

Kriminelët e luftës duhet dënuar dhe për këtë është e nevojshme dhe e domosdoshme përgjegjësia më e lartë institucionale, në radhë të parë e Prokurorisë Speciale e pastaj e tërë sistemit.

Pesha e përgjegjësisë e organeve të drejtësisë tejkalon atë profesionale dhe imponon veprim efikas. Këtë e kemi borxh.

Komento:

	Komenti