Kuvendi nuk e shkarkon bordin e ZRRE-së, dështon mocioni i LDK-së – Ora Info Ballina | ORAinfo.com - Nuk ndalet

Kuvendi nuk e shkarkon bordin e ZRRE-së, dështon mocioni i LDK-së

14:45 | 06 Korrik 2022

Dështon mocioni i LDK-së, Kuvendi nuk e shkarkon bordin e ZRRE-së.

Në Kuvend ka dështuar të miratohet mocioni i Lidhjes Demokratike të Kosovës për shkarkimin e bordit të Zyrës së Rregullatorit për Energji.

Kryeparlamentari Glauk Konjufca njoftoi se 22 deputetë votuan për shkarkimin, 53 ishin kundër dhe asnjë nuk abstenoi.

Paraprakisht pati pak debat. Deputeti i LDK-së, Armend Zemaj, tha se bordi i ZRRE-së nuk ka vepruar siç duhet në procesin e shtrenjtimit të tarifave të rrymës.

“Qytetarët e vendit janë duke e paguar këtë papërgjegjësi”, tha ai, duke kërkuar shkarkimin dhe emërimin e “një bordi të pavarur nga ndikimet politike”.

Deputeti i Partisë Demokratike të Kosovës, Ferat Shala, tha se ky bord “do të duhej të shkarkohej moti”. Për shkeljet ligjore që tha se i ka bërë ky bord, ai tha se anëtarët “do të duhej moralisht të tërhiqeshin vetë”.

Kundër shkarkimit të bordit të ZRRE-së ishte Lëvizja Vetëvendosje. Kryetarja e grupit më të madh parlamentar, Mimoza Kusari e quajti të paarsyeshëm mocionin e LDK-së.

“Përveçse nuk e ka pasë arsyetimin e bindshëm, ka shpërputhje dhe mangësi të plotë me dispozitat ligjore”, tha ajo.

Mocionin e mbështeti edhe Aleanca për Ardhmërinë e Kosovës.

Komento: