Milani e do edhe sulmuesin e Atalantës
Drejtuesit e Milanit janë fokusuar te gjetja e një qendërmbrojtësi në merkaton e janarit. Simon Kjaer ka mbyllur sezonin për shkak dëmtimi dhe Stefano Pioli pret përforcim në prapavijë.
Në “pole position” mbetet Sven Botman i Lille, me kampionët e Francës që kërkojnë 25-30 milionë euro për shërbimet e 21-vjeçarit holandez. Por jo vetëm në mbrojtje.
Kuqezinjtë po kërkojnë edhe një lojtar ofensiv që mund të mbulojë disa pozicione në këtë repart. Në skenë ka dalë një dëshirë e vjetër si Luis Muriel, të cilin Milani e tentoi edhe dy vite më parë.
Atalanta siguroi shërbimet e Jeremie Boga nga Sassuolo për 22 milionë euro. Ardhja e francezit do të thotë më pak minuta aktivizim për Muriel, i cili ka shënuar vetëm një gol në 14 ndeshje këtë sezon në Serie A.
30-vjeçari kolumbian tundohet nga ideja për të luajtur në “San Siro”, por Atalanta nuk dëshiron të forcojë një rival direkt në Itali dhe Milani ka detyrë të bindë drejtuesit zikaltër.