Milani vazhdon punën për të shkurtuar organikën e skuadrës, ndërsa në tavolinën e drejtuesve ka mbërritur një kërkesë për një prej talenteve të rinj të klubit.

Merkatoja e Milanit vijon të jetë e fokusuar jo vetëm te afrimet, por edhe te largimet. Me më shumë se 30 lojtarë në organikë, drejtuesit kuqezi po punojnë për të reduktuar numrin e futbollistëve në dispozicion të trajnerit Ruben Amorim.

Në këtë kuadër, një situatë interesante ka lindur rreth Alphadjo Cissès, përcjell ORAinfo.

Sipas gazetarit Matteo Moretto, të raportuar nga MilanNews, Torino ka kërkuar informacion për mundësinë e transferimit të talentit të Milanit. Klubi granata po monitoron situatën dhe mbetet për t’u parë nëse interesimi do të konkretizohet me një ofertë në orët apo ditët e ardhshme.

Milani, nga ana tjetër, duhet të vendosë nëse është i gatshëm ta lejojë largimin e 20-vjeçarit.

Amorim i ka dhënë hapësirë Cissès

Cissè iu bashkua Milanit nga Hellas Verona, pasi kishte lënë përshtypje të mira gjatë huazimit te Catanzaro në Serie B.

Sezoni i kaluar nuk ishte aspak i lehtë për të, pasi një dëmtim serioz muskulor, që kërkoi edhe ndërhyrje kirurgjikale, e la jashtë fushave për pjesën më të madhe të fazës së dytë të sezonit.

Megjithatë, situata duket se ka ndryshuar me ardhjen e Ruben Amorimit.

Trajneri portugez e ka aktivizuar Cissèn në të gjitha ndeshjet miqësore të zhvilluara deri tani, një sinjal i qartë se ai e konsideron talentin si një lojtar me potencial.

Pikërisht për këtë arsye, vendimi i Milanit për të ardhmen e Cissès do të jetë interesant. Nëse Torino e konkretizon interesimin me një ofertë, kuqezinjtë do të duhet të zgjedhin mes një largimi që mund t’i sjellë hapësirë skuadrës dhe ruajtjes së një talenti që duket se ka fituar vëmendjen e Amorimit. /ORAinfo/

Komento:

	Komenti