Është marrë vendimi qe ekipet e Superligës t’i nisin stërvitjet.
Ministria e Sportit është ajo e cila e ka përcjell në Federatën e Futbollit të Kosovës (FFK) lejen që Ministria e Shëndetësisë ua ka dhënë klubeve të Superligës që t’i fillojnë stërvitjet menjëherë dhe të përgatiten për rifillim të sezonit në fillim të qershorit.
Ministrja e Sportit Vlora Dumoshi e ka zhvilluar sot takimin e saj me presidentin e FFK-së Agim Ademi, të cilit ia ka dorëzuar nj udhëzues me këshilla që duhet t’u përmbahen klubet e futbollit gjatë stërvitjeve.
Të njëjtat rregulla duhet të respektohen edhe në kampionat kur të rifillojë. Sipas Ministrisë së Sportit, IPKO Superliga nis e para, e më vonë Ligat tjera.
Në njoftimin e Ministrisë së Sportit thuhet:
Ministrja e Kulturës, Rinisë dhe Sportit, Vlora Dumoshi, ka zhvilluar një takim me krerët e Federatës së Futbollit të Kosovës (FFK), Agim Ademi – kryetar dhe Eroll Salihu – sekretar, dhe ua ka kumtuar vendimin që kanë ndërmarrë institucionet për lejimin e aktiviteteve për vazhdimin e procesit stërvitor dhe të ndeshjeve të Federatës së Futbollit të Kosovës.
Në bazë të vendimit që ka lëshuar Ministria e Shëndetësisë, Federata e Futbollit të Kosovës duhet t’i përmbahet udhëzuesit të përkohshëm për aplikimin e masave për parandalimin dhe luftimin e COVID-19 në institucionet publike dhe private.
Ministrja Dumoshi ua sqaroi krerëve të FFK-së se fillimisht lejohet që të startojë me përgatitje dhe gara Superliga e Kosovës, e pas disa javëve ligat e tjera. Ministrja porositi kryetarin Ademi e sekretarin Salihu që në përgjegjësinë e organizimit dhe menaxhimit që kanë për futbollin në Kosovë, të ndërmarrin të gjitha masat që parashihen për pastrimin dhe dezinfektimin e hapësirave ku do të zhvillohen aktivitetet e futbollit.
“Ne si ministri do të përcjellim me seriozitetin më të madh dhe nga afër se si po menaxhohet organizimi i stërvitjeve dhe i garave në futboll në këtë kohë pandemie dhe nëse ka ndonjë parregullsi do të ndërmarrim masa konform sugjerimeve të institucioneve shëndetësore dhe nëse është e nevojshme do të ndërpresim prapë garat nëse nuk respektohen këto masa”, tha ndër të tjera ministrja Dumoshi.
Ministrja tha se ndeshjet duhet të zhvillohen pa shikues dhe të kihet kujdes maksimal që mos të jetë shkaktar sporti që edhe një person i vetëm të infektohet me COVID-19.
Nga ana tjetër, kryetari Ademi e ka falënderuar ministren Dumoshi për përkrahjen dhe mirëkuptimin e treguar sepse edhe ata si FFK kanë pasur kërkesa dhe afate të cilat i janë kërkuar nga UEFA se si do të vazhdojnë më tutje për zhvillimin e garave.
Ademi tha se me MKRS-në kanë pasur një bashkëpunim dhe transparencë. Ai e siguroi ministren Dumoshi se do të komunikojnë me secilin me stafin e secilit klub të Superligës dhe do t’ua kumtojnë vendimin dhe udhëzuesin si dhe do t’u shpërndahen materialet e nevojshme për pastrim e dezinfektim. Do t’u kërkohet klubeve që situatën ta kenë në kontroll në rend të parë mjekët e klubeve.
Ndër tjera, Ademi e ka njoftuar ministren edhe për hapat që kanë ndërmarrë FFK-ja për t’iu gjendur afër klubeve dhe sportistëve duke ua shpërndarë edhe mjetet e nevojshme financiare sipas rregullave që i parasheh UEFA.
Ndërsa, ministrja tha se shpreson që organizimi i futbollit në ditët në vijim do të shkojë sipas planit të paraparë dhe ky të jetë një sinjal dhe nismë që sporti t’i paraprijë rikthimit në normalitet në Republikën e Kosovës.
20 °C
