Deputeti holandez Tijs Reuten tha sot se liberalizimi i vizave për qytetarët e Kosovës nuk ka të bëjë me dialogun ndërmjet Beogradit dhe Prishtinës dhe se ai duhet të hyjë në fuqi më 1 janar 2024.
Reuten, i cili është raportues i Parlamentit Evropian për liberalizimin e vizave për Kosovën, po ashtu tha se me këtë çështje merret edhe rezoluta për dialogun Beograd-Prishtinë, e cila do të votohet sot në Parlamentin Evropian.
Kjo, shpjegoi Reuten, është ajo që trajton paragrafi 26 i rezolutës.
“Paragrafi 26 përkujton se Marrëveshja për liberalizimin e regjimit të vizave për Kosovën nuk është dhe nuk duhet të lidhet me dialogun dhe se liberalizimi i vizave duhet të hyjë në fuqi më së voni më 1 janar”, ka shkruajtur Reuten në rrjetin social “X”
Çështja e liberalizimit të vizave për Kosovën doli sërish në fokus pas deklaratës së presidentit francez Emmanuel Macron nga Tirana lidhur me pezullimin e mundshëm të liberalizimit të vizave për shkak se “liderët kosovarë nuk e mbajnë fjalën”./FrontOnline/