Sveçla nga Brukseli: Kriteret për lëvizje të lirë janë plotësuar

21:00 | 30 Qershor 2022

Xhelal Sveçla, po qëndron në Bruksel.

Ministri i Punëve të Brendshme të Kosovës, Xhelal Sveçla, ka bërë të ditur se në Bruksel është takuar me Komisioneren Evropiane për Punë të Brendshme, Ylva Johansson, ku kanë folur për lirinë e lëvizjes për qytetarët e Kosovës.

Sveçla thotë se Johansson i ka rikonfirmuar se kriteret për lëvizje të lirë janë plotësuar.
“Kisha kënaqësinë që të takoj në Bruksel Komisioneren Evropiane për Punë të Brendshme Ylva Johansson. Shpreha falënderimin tonë për ri-konfirmimin e Komisionit Evropian se Republika e Kosovës ka plotësuar në tërësi kriteret për lëvizjen e lirë për qytetarët tanë”, tha ai.

Tutje ai ka thënë se puna për procesin ekzistues për liberalizimin e vizave është duke vazhduar deri në kompletim.
“Komisionerja e BE për Punë të Brendshme Johansson ka ri-konfirmuar që Komisioni qëndron prapa vlerësimit të tij dhe se puna vazhdon tutje në kuadër te procesit ekzistues deri në kompletimin e Liberalizimit të Vizave. Biseduam mbi arritjet e Qeverisë sonë nga hera e fundit kur jam takuar virtualisht me znj. Johansson. Lufta ndaj krimit, korrupsionit, trafiqeve të ndryshme dhe të gjitha veprimtarive ilegale mbetet prioritet i yni andaj në këtë kuptim kam shprehur gatishmërinë tonë për bashkëpunim të ngushtë me të gjitha shtetet aleate për krijimin e stabilitetit në vendin tonë dhe më gjerë”, shtoi Sveçla

Komento: