Mesfushori i Milanit, Franck Kessie mund të shkojë në Barcelonë me shtypin spanjoll që pretendon se është arritur një marrëveshje verbale.

AC Milan ka humbur çdo shpresë për të mbajtur Franck Kessie, kontrata e të cilit skadon në qershor 2022. Kuqezinjtë i kanë ofruar 6.5 milionë në sezon mesfushorit qendror të Fildishtë, por lojtari dhe agjenti i tij George Atangana nuk janë të kënaqur. Palët janë larg arritjes së një marrëveshjeje,përcjell ORAinfo.

25-vjeçari kërkon 8 milionë plus 2 bonuse. Kjo shifër është jashtë buxhetit për kuqezinjtë dhe Franck Kessie do të ndjekë gjurmët e Gianluigi Donnarumma dhe Hakan Calhanoglu të cilët u larguan nga klubi si agjentë të lirë. Destinacioni tjetër i Kessie mund të jetë Barcelona.

Gazetari spanjoll Xavi Campos i Radio Catalunya raporton se Barcelona është në negociata të avancuara për Kessie. Ende nuk është nënshkruar asgjë por palët kanë një marrëveshje verbale. Barcelona i ka ofruar Franck një kontratë pesëvjeçare me 8 milionë euro në vit.

Lajmi konfirmohet edhe nga Sportitalia në Itali. Blaugranët synojnë të përcaktojnë të gjitha detajet e kontratës së lojtarit në javët në vijim. Barça i ka ofruar ish-yllit të Atalantës të njëjtën shifër që kishte ndarë për Georginio Wijnaldum verën e kaluar përpara se ylli holandez të ndryshonte mendimin dhe t’i bashkohej PSG-së./ORAinfo/

Komento:

	Komenti