Një person është arrestuar me urdhër të Prokurorisë Speciale nga Policia e Kosovës – Departamenti Kundër Terrorizmit, në orët e vona të së enjtes, nën dyshimin për nxitje të përçarjes dhe mos durimit.

Kështu është bërë e ditur në një njoftim të Prokurorisë Speciale.

Sipas dyshimeve fillestare, i dyshuari D.Z. pretendohet se para disa ditësh, në një hapësirë publike në Mitrovicën e Jugut, ka përdhosur flamurin e Turqisë.

I njëjti është ndaluar për 48 orë, ndërsa Prokuroria bën të ditur se hetimet janë në vazhdim në koordinim me Policinë e Kosovës.