Në një postim në Facebook, Gërvalla e përshkruan Ramadanin si “Hero të Kosovës, komandant të guximshëm, strateg të mprehtë, poet dhe piktor të talentuar”, duke theksuar rolin e tij në rrugën drejt lirisë. Sipas saj, ai ishte “një figurë e rrallë dhe shumëdimensionale që me vizion, vendosmëri dhe sakrificë e ktheu idealin e lirisë në realitet historik”.

Ajo rikujton momentin e rënies së tij në vijën e frontit gjatë Betejës së Koshares, duke e cilësuar atë si një pikë kthese historike.

“Në 27-vjetorin e rënies heroike të tij në Betejën e Koshares në ballë të frontit çlirimtar… ai mbetet një emër i papërsëritshëm i një kohe që u jetësua nga guximi dhe bindja e pathyeshme,” shkruan Gërvalla.

Ministrja thekson se mesazhi i kësaj sakrifice mbetet aktual edhe sot. “Liria dhe drejtësia arrihen me sakrificë dhe mbrohen me dinjitet,” citohet ajo.

Duke u ndalur te rëndësia e luftës çlirimtare, Gërvalla vlerëson Ushtria Çlirimtare e Kosovës dhe betejën e saj në Koshare si simbol të krenarisë kombëtare.

“Beteja e Ushtrisë Çlirimtare të Kosovës në Koshare ishte dhe mbetet beteja e krenarisë dhe lavdisë, betejë e heronjve që jetësuan ëndrrën shekullore,” thekson ajo.

Gërvalla shpreh nderimet për të gjithë të rënët për liri.

“Lavdi e përjetshme Agim Ramadanit dhe të gjithë atyre heronjve të lirisë që nuk kursyen as jetën, që Kosova të jetojë e lirë, sovrane dhe përherë krenare,” shtoi Gërvalla.