Përvetësuan miliona të shtetit, aktakuzë ndaj dy zyrtarëve të Ministrisë së Shëndetësisë.
Prokuroria Speciale e Kosovës ka ngritur aktakuzë kundër dy të pandehurve M.S. dhe G.A., zyrtarë në Ministrinë e Shëndetësisë, për veprat penale “Përvetësimi në detyrë” dhe “Hyrje në sistemet kompjuterike”.
Ata kanë keqpërdorur pozitën e tyre për të pëvetësuar miliona euro të shtetit që u janë besuar atyre për menaxhim për katër vjet me radhë, njofton Klan Kosova.
“I pandehuri M.S. si person zyrtar në vazhdimësi, në periudhën kohore prej vitit 2014 deri në fund të muajit mars 2018, me dashje dhe me qëllim të përfitimit të kundërligjshëm të dobisë pasurore për vete ka përvetësuar pasurinë e luajtshme, paratë e tërhequra në emër të avancave për udhëtime zyrtare për zyrtarët e AKPPM-së (Agjencia e Kosovës për Produkte Medicinale), të cilat të pandehurit i janë besuar në menaxhim sipas pozitës së tij në kuadër të AKPPM-së. Gjatë asaj periudhe në emër të avancave për udhëtime zyrtare të zyrtarëve të AKPPM-së, nga llogaria bankare e Ministrisë së Shëndetësisë, nga shuma e përgjithshme prej 1,355,441.14 €, të tërhequra nga zyrtari i MSH-së, F.K, e të cilat i ka pranuar i pandehuri M.S, duke nënshkruar në fletë tërheqje me rastin e pranimit e për shumën prej 1,221,501.14 €, nuk ka asnjë dëshmi në AKPPM, se janë respektuar procedurat për tërheqje”, thotë Prokuroria Speciale.
Për këtë veprim atij i ngarkohet vepra “Përvetësimi në detyrë”.
“Po ashtu, të pandehurit M.S në cilësinë e personit zyrtar në Ministrinë e Shëndetësisë dhe G.A. prej datës 07.02.2018 deri më 12.02.2018, me qëllim të përfitimit të kundërligjshëm pasuror për vete apo tjetrin, në bashkëkryerje, në mënyrë te paautorizuar përmes ueb shfletuesit intrnet explorer kanë hyrë në sistem kompjuterik SIMFK, të personave zyrtar të Ministrisë së Financave-Thesarit dhe në kompjuterin e regjistruar në Ministrinë e Shëndetësisë, duke keqpërdorur User-at (fjalëkalimet) e personave të tjerë, zyrtarë të -Thesarit, të pandehurit ju kanë qasur sistemit SIMFK, kanë mbyllur avancat duke bërë regjistrimin si shpenzim dhe certifikim të avancave për udhëtime zyrtare të tërhequra nga banka gjatë vitit 2017, në emër të zyrtarëve të AKPPM-së dhe atë me User në emër të B.M, më 07 shkurt 2018, kishin regjistruar si shpenzim i avancave për udhëtime zyrtare 15 kuponë shpenzimi në vlerë prej 20,850.00 €”.
“Ndërsa në emër të I.Sh., gjatë periudhës 08-12 shkurt 2018, kishin regjistruar si shpenzim i avancave për udhëtime zyrtare shtatëdhjetedy (72) kuponë shpenzimi në vlerë prej 154,736.84 €, në shumë të përgjithshme prej 175,586.84€, e të gjitha të certifikuara me User të M.S., duke u munduar të arsyetojnë këtë shumë të avancave të tërhequra nga banka NLB, në emër te zyrtarëve të AKPPM, në kundërshtim me dispozitat ligjore e për të cilat nuk disponohet me dokumentacion në AKPPM, për arsyeshmërinë dhe lejimin e tërheqjes së tyre”.
Me këto veprime të pandehurit në bashkëkryerje kanë kryer veprën penale “Hyrje në sistemet kompjuterike”.
15 °C
