Barcelona mund të hyjë në ditët e fundit të afatit kalimtar me një skuadër dukshëm më ndryshe nga ajo që kishte planifikuar në fillim të verës.

Pas largimit të befasishëm të Ronald Araujos drejt Liverpoolit në formë huazimi, në Camp Nou mund të ketë edhe disa “ndarje” të tjera. Në listën e lojtarëve që po përballen me një të ardhme të pasigurt janë disa emra që deri vonë konsideroheshin pjesë e rëndësishme e projektit katalunas.

Araujo, i cili kaloi një periudhë të vështirë nën drejtimin e Hansi Flickut, vendosi të kërkojë një aventurë të re pasi hapësira e tij në skuadër ishte zvogëluar ndjeshëm. Madje, një nga momentet më të pazakonta të sezonit të kaluar ishte përdorimi i tij në sulm si zgjidhje emergjente.

Por uruguaiani mund të mos jetë i fundit që largohet.

Ferran Torres, nga hero i Spanjës te largimi nga Barcelona?

Një prej situatave më interesante është ajo e Ferran Torresit.

Barcelona kishte menduar që Julian Alvarez të ishte një prej emrave kryesorë të gjeneratës së re të sulmit, me argjentinasin që do të merrte një rol të rëndësishëm pas Robert Lewandowskit. Por ky plan duket se është komplikuar.

Alvarez pritet të vazhdojë të qëndrojë te Atletico Madridi, ndërsa Ferran po afrohet gjithnjë e më shumë me një largim nga Barcelona.

Sulmuesi spanjoll e rriti ndjeshëm vlerën e tij pas një momenti vendimtar me kombëtaren, duke shënuar golin që i dha Spanjës triumfin në finalen e Kupës së Botës. Megjithatë, Barcelona nuk ka bërë hapa konkretë për t’i ofruar një kontratë të re.

Nëse transferimi i tij te Paris Saint-Germaini realizohet, Barcelona do të humbte një tjetër opsion ofensiv dhe do të duhej të gjente me urgjencë një sulmues të ri.

Në të kundërt, Flick mund të detyrohet të përdorë Anthony Gordonin ose Karim Adeyemin në qendër të sulmit.

Casado, nga talent i La Masias në prag të largimit

Një tjetër situatë e komplikuar është ajo e Marc Casados.

Mesfushori 22-vjeçar dikur shihej si një nga produktet më premtuese të akademisë së Barcelonës, por një dëmtim serioz në gju në mars të vitit 2025 ndryshoi ndjeshëm pozicionin e tij në skuadër.

Pas rikthimit, Casado nuk e gjeti më veten në të njëjtin rol. Ai mbeti prapa Marc Bernalit, Eric Garcias dhe më vonë edhe Gavit në hierarkinë e Flickut.

Situata mund të bëhet edhe më e vështirë nëse Barcelona arrin të transferojë Rodrin nga Manchester City.

Casado tashmë ka dhënë disa sinjale se e ardhmja e tij në Camp Nou është në pikëpyetje. Ai nuk ishte pjesë e grupit që udhëtoi me Barcelonën drejt Italisë për fazën përgatitore dhe aktualisht po stërvitet i veçuar nga pjesa tjetër e skuadrës.

Për të ka interesim edhe nga Arabia Saudite, me Al Hilalin që është përmendur si një prej destinacioneve të mundshme.

Flick, ndërkohë, e ka lënë të hapur mundësinë e largimit të tij.

“Duhet të merren vendime”, ishte deklarata e trajnerit gjerman që ka shtuar edhe më shumë pikëpyetjet rreth të ardhmes së Casados.

Edhe Hector Fort mund të largohet

Në listën e lojtarëve që mund të largohen është edhe Hector Fort.

Mbrojtësi 20-vjeçar u rikthye këtë verë nga huazimi te Elche, por nuk ka arritur ta bindë Flickun se duhet të ketë një rol të rregullt në ekipin e parë.

Konkurrenca në krahun e djathtë është e madhe. Jules Kounde mbetet zgjedhja kryesore, ndërsa Joao Cancelo pritet të vazhdojë të jetë pjesë e Barcelonës. Për më tepër, paraqitja e Xavi Espart i ka dhënë Flickut një tjetër alternativë.

Kjo e bën gjithnjë e më të vështirë gjetjen e minutave për Fortin.

Mbrojtësi spanjoll është lidhur me disa klube evropiane dhe së fundmi është raportuar edhe interesimi i Fulhamit nga Premier League.

Megjithatë, ndryshe nga disa prej emrave të tjerë, Fort nuk duket se është i bindur për ta mbyllur aventurën e tij në Camp Nou.

Nëse këto largime realizohen, Barcelona do ta mbyllte verën me një seri ndryshimesh të rëndësishme në skuadër – dhe disa prej tyre do të ishin veçanërisht të papritura duke parë rolin që këta lojtarë kishin në projektin katalunas vetëm pak kohë më parë.

Komento:

	Komenti