Është duke vazhduar seanca e jashtëzakonshme e Kuvendit të Kosovës për gjendjen në Telekom.

Lideri i Vetëvendosjes, Albin Kurti ka thënë para deputetëve se kontrata e Telekomit me Z-Mobile është kr.im i organizuar dhe faktor kryesor i krizës së Telekomit.

Ai tha se kontrata me Z-Mobile, është aktuale dhe dëmet e kësaj kontrate jo ligjore vazhdojnë të thellohen çdo ditë.

Kurti tha se Z-Mobile, dëshiron ta marrë Telekomin dhe prapa saj qëndron Presidenti Thaçi dhe ish shefi i shefave (duke aluduar të Adem Grabovci).

“Z-Mobile dëshiron që ta marrë të tërën Telekomin, Prapa saj qëndron presidenti, dhe ish shefi i shefave”, ka thënë Kurti, raporton Express.

Kurti përmendi disa metoda për zgjidhjen e problemit. E para, tha se si dëshmi është kontrata mizore në mes të Telekomit dhe Z-Mobile.

Ai shtoi se kontrata ishte konsideruar e dëmshme, mirëpo Qeveria prapë se prapë e kishte nënshkruar atë.

Kurti thesoi se në vitin 2009, Telekomi i Kosovës i dha buxhetit 200 milionë euro, e sot po e kërcënon falimentimin.

Ai tha se privatizimi i Telekomit është problem i madh, pasi Kosova si shtet për tokë, nuk duhet të privatizojë.

“Privatizimi është problem shumë i madh. Është e vërtetë që një pjesë e aksioneve iu takon privatëve, shteti i fuqishëm e ka luksin të japë privatizim, mirëpo një shtet për tokë, si Kosova nuk e ka këtë luksin”, ka thënë Kurti, duke shtuar se pa e forcuar shtetin, nuk guxojmë të privatizojmë.

Albin Kurti përmendi edhe kur Kuvendi i Kosovës vitin e kaluar, e kishte miratuar rezolutën për shpëtimin e Telekomit, më 12 korrik.

“Kuvendi e ka miratua rezolutën, mirëpo qeveria nuk po e zbaton atë. Me 12 pika, Kuvendi e ka dhënë zgjidhjen se si të shpëtohet Telekomi”, ka thënë ndër të tjera Albin Kurti.

Komento:

	Komenti