Reja thotë se do të donte të vazhdojë me Shqipërinë.

Më shumë sesa humbja ndaj Francës rezultati që përndjek akoma Edoardo Rejan është barazimi ndaj Andorrës të enjten në Elbasan Arena.

Pas sfidës ndaj “Gjelave” në stadiumin e ri “Air Albania” trajneri italian i bëri një vlerësim të gjithë fushatës eliminatore të Euro 2020, foli për formacionin por edhe për të ardhmen e tij në stolin e Shqipërisë.

“Kundër Andorrës e thamë që ishte ndeshje shumë e dobët dhe fakti që çështja e Europës ishte mbyllur dhe nuk flitej për pikë na bëri të humbnim vëmendje dhe doli e dobët. Sot kishim kampionët e botës dhe bëmë lojë të mirë. Kemi bërë mirë dhe me lojtarë të rinj. Doja ta mbyllnim më mirë por nuk ia dolëm dhe më vjen keq”, u shpreh Reja, raporton Supersport.

Tutje ai ka shtuar se, “doja të shihja futbollistët edhe në fushë. Doja t’i jepja hapësirë të gjithëve dhe do ta bëja edhe më herët. Me pak më shumë fat mund të merrnim pikë me Turqinë, Islandën. Me Andorrën do të merrnim rezultat pozitiv por kjo skuadër më ka dhënë tërheqje dhe kemi pasur rritje. Kjo është shumë e rëndësishme”.

Kurse për të ardhmen e tij ai tha se do të flasë me kreun e FSHF-së, por nuk e ka fshehur dëshirën për të vazhduar me Shqipërinë.

“Do të flas me presidentin për të ardhmen time pasi kontrata ime përfundon sot. Kemi bërë një punë të mirë dhe më ka pëlqyer. Do të doja të vazhdoja me Kombëtaren shqiptare”, u shpreh Reja.

Komento:

	Komenti