Çekia ka mposhtur mbrëmë Kosovën për t’u kualifikuar në kampionatin evropian ‘Euro 2020’.
Trajneri i Republikës Çeke, Jaroslav Silhavy thotë se gëzimi është jashtëzakonisht i madh në taborin çek pas fitores 2:1 ndaj Kosovës. Ai ndihet mjaft i lumtur me kualifikimin e çekëve në Kampionat Evropian
Republika Çeke e mposhti mbrëmë Kosovën me përmbysje me rezultat 2:1 për ta siguruar njëherësh kualifikimin në Kampionatin Evropian të futbollit, shkruan Gazeta Express.
Ky fakt e ka gëzuar tej mase trajnerin Jaroslav Silhavy, i cili këtë sukses e ka barazuar me titujt që i kishte fituar me ekipet Liberec dhe Slavia Praga.
Ai është edhe më krenar për faktin se lojtarët e tij ia dolën ta shkrinin epërsinë e Kosovës për të fituar në fund.
Trajneri çek beson se ekipi i tij do të jetë mjaft konkurrues në Euro 2020.
“Nëse për shembull do të fitonim 3:0, atëherë gëzimi nuk do të ishte i njëjtë, nuk do të ishte aq i madh. Ndërkohë, unë po mendoja se ne po e lëshonim këtë mundësi në shtëpi dhe se gjithçka do të vendosej në Bullgari. Në fund, dëshira e madhe për të fituar vendosi, ne shënuam dy gola. Gëzimi dhe euforia është e madhe dhe po e shijoj këtë moment”, deklaroi Silhavy.
“Kualifikimi në Euro 2020 me ekipin kombëtar si trajner është diçka mjaft prestigjioze, por titujt që i pata fituar me ekipet që i kam drejtuar ishin suksese të mëdha po ashtu”, nënvizoi Silhavy.
Ai e ka pranuar se goli i avantazhit i Kosovës ka qenë momenti më i vështirë për të në këtë kampanjë kualifikuese.
Kosova ëndërroi edhe vetë përkohësisht, por më pas çekët u rikthyen furishëm në 20 minutat e fundit duke shënuar dy herë, me Alex Král e Ondřej Čelůstka.
“Ndoshta ishte momenti më i keq në këto kualifikime. Kjo ndeshje konsiderohej si loja e vitit. Jam i kënaqur dhe krenar që ishim në gjendje të riktheheshim dhe ta kishim epërsinë në anën tonë. Ekipi e shfaqi përsëri karakterin e tij. Bëmë presion, patëm raste dhe më pas erdhën edhe golat”, u shpreh tutje 48 vjeçari.
Çekia i fitoi të katër ndeshjet në shtëpi, përfshirë këtu edhe atë kundër Anglisë në muajin tetor, 2:1.
“Në fillim të kualifikimeve e morëm një shuplakë (0:5 nga Anglia). Mirëpo, më pas ne i fituam të gjitha ndeshjet në shtëpi, që do të thotë se kjo ishte baza e suksesit tonë”, përfundoi Silhavy.